काठमाडौँ । अरब सागरलगायत राजस्थान आसपासमा देखिएको न्यूनचापीय क्षेत्रको प्रभावका कारण नेपालको मौसममा खराबी आएको छ । न्यूनचापीय क्षेत्रको प्रभावले आज देशभर मौसम बद्ली हुनुका साथै केही चिसो महसुस भएको छ ।
उक्त प्रणाली नेपालको पश्चिमी र दक्षिण पश्चिमी भेगबाट गए राति प्रवेश गरेका कारण नेपालको आकाश बादलले ढाकेको मौसमविद् सुवास रिमालले राससलाई जानकारी दिनुभयो । “राति नेपाल प्रवेश गरेको प्रणालीले मुलुकभर बद्ली भएको छ, यो प्रणाली आज बेलुकाबाट हटेपनि पुनः मध्यरातबाट अर्को प्रणाली (पश्चिमी न्यूनचापीय क्षेत्रको विकासबाट बन्ने) आउँदैछ । पश्चिमी क्षेत्रमा आइतबार अपराह्नपछि वर्षा हुनेछ”–उहाँले भन्नुभयो ।
सोही प्रणालीका कारण पश्चिमी क्षेत्रमा वर्षासँगै उच्च हिमाली भेगमा हिमपात हुने र सोमबारदेखिमात्र मौसममा सुधार आउनेछ । पश्चिमी न्यूनचापीय प्रणाली बढी शक्तिशाली र सक्रिय भएमात्रै काठमाडौँ उपत्यकामा असर पर्ने नत्र सामान्य रहने मौसमविद् रिमालले उल्लेख गर्नुभयो । उपत्यकासहित देशभर बद्लीसँगै न्यूनतम तापक्रम बढे पनि घाम नलागेका कारण आज बढी चिसो महसुस गरिएको छ ।
आज काठमाडौँ उपत्यकाको न्यूनतम तापक्रम ६ डिग्रीसेल्सियस र अधिकतम तापक्रम २१ डिग्रीसेल्सियस रहेपनि एक दुई दिन बद्ली रहने भएकाले अझै न्यूनतम तापक्रम बढ्ने मौसम पूर्वानुमान महाशाखाले जानएको छ । रासस
