जीपीए ४ ल्याउने अन्जलीको लक्ष्य डाक्टर बन्ने (अन्तर्वार्ता)
प्रकाशित २०७५ असार १० आइतबार
230
Shares
एसईई परीक्षाको नतिजा सार्वजनिक भएसँगै उत्कृष्ट को भन्ने विवाद यो पल्ट पनि देखिएको छ । पोहोर पनि यस्तै दावीहरु आएका थिए । नम्बरको सट्टा ग्रेडिङ गर्ने प्रावधानले सिर्जनामा भएको उत्कृष्टको विवाद समाधान अब राष्ट्रिय परीक्षा बोर्डबाटै हुनेछ । महेन्द्र विद्या अाश्रम भक्तपुरका सार्थक मल्ल उत्कृष्ट भएको दाबी लगत्तै पर्वत कुश्मास्थित कालिगण्डकी एकेडेमीकी अन्जली पुरीले पनि जिपिए ४ नै ल्याएको दावी विद्यालय तथा परीक्षार्थी स्वयंले गरेकी छन् । हामीले अन्जली पुरीसँग कुरा गरेका छौँ ।
० एसईईमा उत्कृष्ट भएँ भनेर कतिबेला थाहा पाउनुभयो ?
– हिजो रिजल्ट आयो, हिजै साँझ थाहा पाएँ ।
० ४ जिपिए आउँछ भनेर आश गर्नुभएको थियो ?
– हल्का थियो पनि, डर पनि लागेको थियो ।
० के को डर ?
– नयाँ ठाउँमा चेक गर्ने जाने, के हुन्छ, कसो हुन्छ भन्ने डर लागेको हो ।
० कति समय पढ्नु हुन्थ्यो ?
– स्कुल र घरमा राम्रै पढाइ थियो । र, त्यहीअनुसार मेहनत पनि गरेको थिएँ ।
० पढाइलाई कति समय छुटाउनुभएको थियो ?
– दिउँसो स्कुलमै पढथें ।
० चार जिपिए ल्याउन कतिको कठिन रहेछ ?
– मेहनत गर्नुपर्छ, कठिन हुँदैन । मेहनतको फल आइहाल्छ नि ।
० ट्यूशन पढ्नुभयो ?
– हामीलाई स्कुलमै टिउसनको सुविधा थियो । बाहिर ट्यूशन पढिएन ।
० घोकेर कि बुझेर पढ्नुपर्छ ?
– घोकेर होइन, बुझेर पढ्नुपर्छ । टिचरले पढाएको बेला पढाइमा ध्यान केन्द्रित गर्नुपर्छ । त्यसलाई नोट टाउन गरेर रिवाइज गर्यो भने सजिलो हुँदो रहेछ ।
० के बन्ने लक्ष्य लिनुभएको छ ?
– विज्ञान विषय लिएर पढ्छु, भविष्यमा डाक्टर बन्छु ।
