मेडिकल एसोसिएसनको प्रश्न, राज्यले के सहयोग खोजेको हो ? 

प्रकाशित मिति : २०७५ असार २९ शुक्रबार

काठमाडौं । आमरण अनसनरत डा गोविन्द केसीको स्वास्थ्य खस्किँदै गर्दा सरकारले भने उनलाई बचाउने पहल गरेको छैन । १४ दिनदेखि जुम्लामा अनसनरत डा केसीलाई बुधबार (असार २७) काठमाडौं ल्याएर उपचार गर्ने सरकारले बताए पनि व्यवहारमा उतारेको छैन । 

सरकारले नेपाल मेडिकल एसोसिएसनले सहयोग नगरेका कारण डा केसीलाई काठमाडौं ल्याउन नसकेको आरोप लगाएको छ । 

हुनत डा केसीलाई मेडिकल एसोसिएसनको सहयोग नै भएन भन्नु गलत हो । राज्यले चाह्यो भने तत्काल ल्याएर उपचार गर्न सक्छ । 

यसबारे एसोसिएसनका अध्यक्ष डा मुक्तिराम श्रेष्ठले सरकारले एसोसिएसनबाट के सहयोग खोजेको हो भनी प्रश्न गरे । 

उनले भने, ‘वार्ता कमिटि बनाउने हो भने डा. केसीलाई ल्याउन जान्छौं भनेर भनेका थियौं सरकारले टेरेन । अरुलाई दोष लगाएर सरकार पन्छिएको छ । नियत ठीक नभएको पाइयो ।’

डा श्रेष्ठले भने, ‘१५ औं पटकसम्म एउटै मागलाई लिएर आमरण अनसन बस्नुपर्ने अवस्था आउनु जत्तिको दुर्भाग्य के हुन सक्छ ?’

के गर्दैछ शुक्रबार मेडिकल एसोसिएसन ? 
डा केसी बचाउ अभियानका लागि मेडिकल एसोसिएसनले दवावका कार्यक्रमहरु थालिसकेको छ । बिहान १० देखि ११ बजेसम्म १ घण्टा प्रत्येक अस्पताल अगाडि धर्ना बस्ने, नेताहरुलाई भेटेर माग पूरा गर्न दवाव दिने र पेशागत समूहका व्यक्तिहरुसंग छलफल गर्ने कार्यक्रम रहेको डा श्रेष्ठले बताए । 

रेजिडेन्ट चिकित्सकहरु पनि आन्दोलित
शिक्षण अस्पताल महाराजगञ्जका रेडिजेन्ट चिकित्सक र इन्टर्नहरुले माइतीघर मण्डलामा ओपीडी सेवा संचालन गर्ने भएका छन् । बिहान १० देखि ११ बजेसम्म उनीहरुले ओपीडी संचालन गर्नेछन् । 

सोही स्थानमा सामूहिक भेला प्रदर्शन गरी दिउँसो पत्रकार सम्मेलन गर्ने कार्यक्रम रहेको नेशनल रेडिजेन्टडक्टर्स एसोसिएसनका अध्यक्ष डा सुमित पाण्डेले जनाएका छन् । 

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ