म निक्कै ठूलो हल्ला सुन्दैछु
बिशाल भू–मण्डलको
सुन्दर फुलबारीमय
एउटा सानो देशमा
सत्याग्रही एउटा बुढो डाक्टर
एक्लै
आडम्बरी सत्तालाई
सत्यको पाठ पढाउन खोज्दैछ रे ।
कस्तो हठी हो त्यो डाक्टर
सत्ताले सत्यबोध नगरे
ऊ आफै
आफ्नै मृत्यु रोज्दैछ रे ।
अर्को हल्ला पनि सुनिँदै छ
दूरदराज गाउँघरका
मान्छेहरु भन्छन्
ऊ त
असंख्य गरीब नेपालीहरुको
मृत्यु जित्न खोज्दैछ रे ।
कस्तो अचम्म
एउटा बुढो लुरे डाक्टर
मृत्युलाई पैतालामा कुल्चिएर
करोडौ निमुखाहरुको
भरोसामा ज्युन खोज्दैछ रे ।
पागल जस्तो कस्तो डाक्टर
डाक्टरी पेशाले अर्जेको
कुस्त पैसामा रमाउन बिर्सेर
लाखौ गरीबहरुको हाँसोमा
उm पनि संगसंगै
हाँस्न खोज्दैछ रे ।
लाटो डाक्टर
पीडा बेचेर नाफा कमाउने
आँसुका ब्यापारीहरुसंग
मानवताको सर्तमा
माग पूरा गर भन्दैछ रे
माग पूरा नभए
कसैसंग केही गुनासो नगरी
जीवनका अन्तिम दिनहरु
ऊ आफै एक्लै गन्दैछ रे ।
सत्यलाइ बचाउन
सोक्रेट्सले बिषपान गरेझैं
गरीव र निमुखाहरुको खुशी बचाउन
ऊ पनि
मृत्यु बरण गर्न खोज्दैछ रे ।
वाहा रे ! वाह !
हिमाल मुनिको सुन्दर पहाडी बस्तीमा
एउटा बुढो लुरे डाक्टर
निक्कै हल्ली खल्ली गर्दैछ रे ।
