चिकित्सकलाई सरकारको खवरदारी, चिकित्सकको सरकारलाई च्यालेन्ज

प्रकाशित मिति : २०७५ श्रावण ३ बिहिबार
तस्वीर–वेब

काठमाडौं । सरकारले प्राडा गोविन्द केसीका मागहरु पूरा गर्न र केसीको जीवनरक्षा गर्न दबाब दिन नेपाल चिकित्सक संघ आन्दोलित भएको छ । 

संघको आव्हानमा देशभरका सरकारी तथा निजी अस्पताल तथा क्लिनिकमा आकस्मिक सेवा बाहेकका सम्पूर्ण स्वास्थ्य सेवा बन्द भएका छन् । 

संघले एक दिने सेवा ठप्प पारेको हो । तर सरकारले यसरी ठप्प पार्दा समेत वास्ता नगर्ने हो भने अनिश्चितकालीन बन्द गर्न तयार हुने चेतावनी सरकारलाई दिएको छ । 

सरकार के भन्छ ? 
कानुन मन्त्री शेरबहादुर तामाङले बिरामीलाई अस्पतालमा छाडेर कुनै पनि चिकित्सक आन्दोलनमा नजाने दावी गरेका छन् । उनले विरामी छाडेर कोही पनि डाक्टर बाहिर ननिस्कने भन्दै चिकित्सकलाई सचेत पारेका छन् । 

उनले चिकित्सकहरु आन्दोलित भइरहेका बेलामा जानकारी नभएको जस्तो गरी ‘केही चिकित्सकहरु आन्दोलनमा जानुहुन्छ तर धेरै डाक्टरहरु विरामीको उपचार गर्नुहुन्छ’ भने । 

यसअघि नै सरकारका विभिन्न मन्त्रीहरुले विरामीको उपचार गर्न छाडेर आन्दोलनमा होमिने चिकित्सकलाई जागिरबाट हटाउने समेत भनिसकेका छन् । 

जागिरको माया छैन –डा ढुंडिराज पौडेल
नेपाल चिकित्सक संघका वरिष्ठ उपाध्यक्ष डा ढुंडिराज पौडेलले जागिरको माया नभएको भन्दै सरकारलाई कार्वाही गरेर देखाउन चेतावनी दिएका छन् । 

विभिन्न मन्त्रीहरुले आन्दोलनमा होमिने डाक्टरलाई सेवाबाट हटाउने चेतावनी दिँदै डा गोविन्द केसीको आमरण अनसनलाई शिथिल बनाउने प्रयास थालेपछि डा पौडेलले सरकारको हिम्मत भए कार्वाही गरेर देखाउन चुनौती दिएका हुन् । 

‘चिकित्सकहरुले नाजायज माग नराखेको र डा गोविन्द केसीको जीवन रक्षाको माग गर्दा समेत सरकारले कार्वाही गर्न खोज्छ भने जागिर खोसेर देखाओस्’, डा पौडलले भने ।

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ