काठमाडौं । कुकुर । नामै कुकुर भएपछि उसलाई हेर्ने दृष्टिकोण अझै फरक हुन्छ । कुकुर साथमा हुनुका फाइदा धेरै भए पनि मानिसलाई नराम्रो तरिकाले सम्वोधन गर्दा कुकुर नै भनेर पुकारिन्छ ।
मानिसलाई बेइज्जत गर्नुपर्यो भने कुकुर नै भनेर सम्वोधन गरिन्छ । मानिसले सम्मान पाउँदैन । तर मरेपछि त कुकुर पनि सम्मान पाउँछ भने मानवजीवनले किन नपाउने भन्ने बहस चल्नु सामान्य हो ।
त्यस्तै सम्मान पाएको छ एक कुकुरले । घटना इटालीको हो । एउटा कुकुरको मृत्यु भएपछि लाखौं मानिस दुःखी भएका छन् । उनीहरुले उक्त कुकुरप्रति भावुक हुँदै श्रद्धाञ्जली अर्पण गरेका छन् ।
उक्त कुकुरका मालिक फाबियानो इटोरले आफ्नो कुकुरको मृत्यु भएको जानकारी फेसबुकमार्फत दिएका हुन् । काओस नाम गरेको ‘जर्मन शेफर्ड’ जातको सो कुकुरको मृत्यु विषबाट भएको उनले जनाएका छन् । कसैले दिएको विषबाट आफ्नो कुकुरको मृत्यु भएको जानकारी उनले दिएका हुन् ।
त्यसपछि त्यो फेसबुक सन्देश हजारौंले सेयर गरेका छन् । फाबियानोले फेसबुकमा कुकुरलाई सम्बोधन गर्दै लेखेका छन्, ‘त्यहाँ गएर पनि आफ्नो काम जारी राख्नू, हराइरहेका मानिसलाई खोज्नू र उनीहरुको जीवन बचाउनू ।’
काओसले सन् २०१६ अगस्टमा इटालीमा गएको भूकम्पपछि उद्धारका क्रममा कयौं मानिसको ज्यान जोगाएको थियो । उसले भग्नावशेषमा पुरिएका मानिसको खोजीमा उल्लेखनीय भूमिका निर्वाह गरेको थियो ।
कुकुरले पनि राम्रो काम गर्छ र त प्रशंसा पाउँछ । त्यसैले मानिसलाई गाली गर्दा त्यो संवोधन ठीक भएन कि !
