काठमाडौं । एचएमडी ग्लोबलको स्वामित्वमा रहेको नोकिया कम्पनीले आफ्नो नयाँ स्मार्टफोन नोकिया ७.१ प्लस बजारमा ल्याउने तयारी गरेको छ । विश्वव्यापीरुपमा आफ्नो व्यापार विस्तारको क्रममा रहेको कम्पनीले अक्टोबर ४ मा बेलायतको लण्डनमा यो स्मार्टफोन सार्वजनिक गर्ने तयारी गरेको हो ।
कम्पनीको तर्फबाट आधिकारिकरुपमा कुनै जानकारी नआएपनि कम्पनीले लण्डनमा सो कार्यक्रमको आयोजना गर्ने घोषणा गरेसँगै सो कार्यक्रममा उक्त स्मार्टफोन सार्वजनिक हुनसक्ने बताइएको हो ।
यसअघि नोकियाको नोकिया ९ स्मार्टफोन पनि अब छिट्टै बजारमा आउनसक्ने अनुमान गरिएकोमा सो स्मार्टफोन भने सन् २०१९ को विश्व मोबाइल सम्मेलनमा सार्वजनिक गरिने कार्यतालिका सार्वजनिक भएको हो ।
के छन् नोकिया ७.१ प्लसको विशेषताहरु ?
यो स्मार्टफोन झट्ट हेर्दा नोकिया ६.१ प्लसको जस्तै रहनेछ । जसमामा ड्युअल क्यामेराको प्रयोग हुनसक्ने बताइएको छ । अहिले सार्वजनिक भएको फोटोको आधारमा यो स्मार्टफोनमा १०८०×२२८० पिक्सेलको रिजोलुसन रहनसक्ने विश्लेषकहरुले बताएका छन् । साथै यसमा ६जीबी र्याम र १२८ जीबीको इन्टर्नल स्टोरेज रहनसक्ने बताइएको छ ।
अहिलेसम्म यो स्मार्टफोनको मूल्यको विषयमा भने कुनै जानकारी दिइएको छैन । अबको केही दिनमा यसको मूल्य तोकिनसक्ने बताइएको छ । (एजेन्सी)
