एजेन्सी । स्पेनिश लिग ला लिगा फुटबलमा क्रिश्चियानो रोनाल्डोले पेनाल्टी खेर फालेपछी रियाल मड्रिड बराबरीमा रोकिएको छ । मालागाले रियाललाई घरेलु मैदानमा १–१ बराबरीमा रोकेको हो । ३३औं मिनेटमा रोनाल्डोले गोल गर्दै अग्रता दिलाए । यद्यपि, ३६औं मिनेटमा अग्रता दोब्बर पार्न पाएको सुवर्ण मौका गुमाए । रोनाल्डोले पेनाल्टी खेर फाले । उनले नजिकैबाट हानेको पेनाल्टी मालागाका किपरले निस्तेज पारिदिए । दोस्रो हाफपछी मालागाका राउल अल्बेन्टोसाले जवाफी गोल फर्काउँदै १–१ को बराबरी गरे । नयाँ प्रशिक्षक जिनेदिन जिदान आएपछी रियाल मड्रिडले छलाङ्ग मार्ने अपेक्षा गरिएकामा हाल सम्म त्यसो हुन सकेको छैन । रियाल तेस्रो स्थानबाट माथि उक्लिन सकेको छैन ।
यस्तै, अन्य खेलमा एथ्लेटिको मड्रिडलाई भिल्लारियलले गोल रहित बराबरीमा रोकेको छ । रियाल सोसिडाडले एथ्लेटिक विल्बाओलाई १–० ले हराउँदा भ्यालेन्सियाले ग्रनाडालाई २–१ ले हराएको छ । सेभिया र रायो भायकानोले २–२ को बराबरी खेल्दै अंक बाँडे । २५औं चरणका खेल सकिँदा सम्म ६३ अंक बटुलेको बार्सिलोना शीर्ष स्थानमा छ । ५५ अंकको एथ्लेटिको मड्रिड दोस्रो तथा ५४ अंकको रियाल मड्रिड तेस्रो स्थानमा छ ।
