तिहारको चर्चीत गीत ‘दीयो बाली साँझको...’ रिमेक बजारमा (भिडियो)
प्रकाशित २०७५ कार्तिक २० मंगलबार
612
Shares
काठमाडौं ।‘दीयो बाली साँझको...’ भारतीय गायिका आशा भोसलेले गाएको तिहारको यो गीत नेपाली जनमानसमा परिचित छ । २८ वर्ष अघि गाइएको सो गितलाई हालै मात्र नेपाली गायिका जमुना शर्माले रिमेक गरेकी छिन ।
२०४७ सालमा रिलिज भएको नेपाली चलचित्र ‘चिनो’मा समावेश सो गितको शब्द तुलसी घिमिरेले रचना गरेका हुन् भने ‘ओरिजिनल’ संगीत रञ्जित गजमेरको छ ।
हाल रिमेक गरिएको गितलाई भने गायिका शर्माका श्रीमान प्रमोद तिमिल्सिनाले संगित दिएका छन । लामो समय देखि भारतको मुम्बईमा बस्दै आएकी गायिका शर्माले संगीतकार रन्जित गजमेरको अनुमतीमा यो गीतलाई रिमेक गरेकी हुन ।
भारतीय गायक कैलाश खेरको मुम्बईमा रहेको कैलाशा स्टुडियोमा सो गित रेकर्ड गरिएको गायिका शर्माले जानकारी दिइन । गीतको भिडियो छायांकन मुम्बई र नेपालमा गरिएको थियो । भिडियोमा दिपावली गरिएको दृश्यमा पनौतीको उग्रचण्डी बोर्डिङ स्कुलका छात्राहरुको अभिनय छ ।
गायिका शर्माले दिपावलीलाई लक्षित गरी गित सार्वजनिक गरिएको बताइन । बाराको पथलैयाका स्थायी बासिन्दा जमुना र उनका श्रीमान प्रमोद विगत एक दशकदेखि मुम्बईको सांगितिक क्षेत्रमा व्यस्त रहँदै आएका छन ।
