काठमाडौँ । महाकवि लक्ष्मीप्रसाद देवकोटाको ११०औँ जन्मजयन्ती बुधबार यहाँ मनाइयो । नेपाल सांस्कृतिक सङ्घद्वारा आयोजित कार्यक्रममा साहित्यकार रमा शर्माले १० वर्षको कलिलो उमेरदेखि नै साहित्य रचना गरेर छोटो अवधिमा नेपाली साहित्यलाई हालको गौरव गर्ने अवस्थामा पुर्याएको बताइन् ।
अङ्ग्रेजीको बोलबाला भएको यस युगमा नेपाली भाषाको पुनरुत्थान गर्न देवकोटा जस्ता मान्छे फेरि चाहिएको उनले बताइन् । शर्माले २०१० मा भानुभक्तको पहिलो शालिक राजा महेन्द्रले शिलान्यास गर्दा महाकवि देवकोटा पनि उपस्थित रहेको उनले जानकारी दिइन् ।
सांस्कृतिक सङ्घका अध्यक्ष गोविन्ददेव पन्तले सङ्घ र देवकोटाको विशेष सम्बन्ध रहेको बताउँदै महाकवि पनि सङ्घको सदस्य रहेको उल्लेख गरे। उनले भारतीय विद्वान राहुल सांकृत्यायन नेपाल आउँदा देवकोटालाई भगवान् बुद्धपछिको ठूलो व्यक्ति भनेको स्मरण गरे । उनले देवकोटा भारतका कविहरु पन्त, प्रसाद र निराला तीनजना संयुक्तभन्दा पनि ठूला कवि रहेको मूल्याङ्कन गरेको सुनाए ।
कार्यक्रममा सङ्घले श्रीमती इशा शाह र गिरिराज जोशीलाई उनिहरुको काव्यिक योगदानका लागि रु १० हजार राशिको देवकोटा काव्यिक पुरस्कार प्रदान गरिएको थियो । सो पुरस्कारका लागि कवि रमेश खकुरेलले रकम उपलब्ध गराएका थिए ।
