काठमाडौं।  वैदेशिक रोजगारीका क्रममा मलेसियामा रहेका एक नेपालीले अर्को नेपालीलाई मरणासन्न हुनेगरी आक्रमण गरेका छन् । व्यक्तिगत दुस्मनीका कारण तेह्रथुमका एक युवालाई आफ्नै साथीले आक्रमण गरी अचेत बनाएका हुन् । गत असोज ३ गते (नोबेम्बर १९) को साँझ विगत ५ वर्ष अगाडिदेखि मलेसियाको सेरेबान भन्ने ठाउँको कवालन केसेलामतन सेन्ट्रल सेक्युरिटी कम्पनीमा काम गर्दै आएका आएका तेह्रथुम जिल्ला, आठराई गाउँपालिका  वडा नं ५  निवासी कूलप्रसाद बर्देवा नाईट डिउटीमा निस्कन तयार हुँदै थिए ।

एकासी केहि मानिसको हुलले उनलाई घेर्‍यो र अन्धाधुन्द उनी माथि आक्रमण गर्न थाल्यो । हतियारसहित आएको त्यो टोलीलार्इ उनले प्रतिकार गर्न सकेनन् । उनको शरीर थिलथिलो नभएसम्म सो समुहले उनी माथि आक्रमण गरिरहेको मलेसियामा बस्ने नेपालीहरुले जनाएका छन् ।  आक्रमणमा तेह्रथुम चुहान डाँडा वडा नं ५  का चन्द्र पञ्चकोटी संलग्न रहेको त्यहा कार्यरत नेपालीले बताएका छन् । बर्देवाको होस् नखुलेकोले उनी विरुद्ध किन आक्रमण भयो भन्ने बारे भने केही खुल्न सकेको छैन ।

अबैधानिक रुपमा मलेसियामा काम गरिरहेका उनलाई प्रहरीले क्लिनिकमा पुर्‍यएको भएपनि उनी अबैधानिक रुपमा बसिरहेकोले उनलाई कुनैपनि क्लिनिकले उपचार गर्न नमानेको मलेसियामा बस्ने नेपालीहरुले जनाएका छन् । उनलाई अहिले एक क्लिनिकको बाहिर खुल्ला ठाउँमा राखेर प्रारम्भिक उपचार भएपछि थप उपचारको लागि स्थानीय एक अस्पतालमा पठाईएको थियो ।

उनीमाथिको त्यो घटना सामाजिक सञ्जालमा आएपछि घटनाको छैटौं दिन उनको बारेमा पहिचान भएको थियो । त्यसपछि उनीहरुले पाँचथरका देबेन्द्र प्रसाईलाई खबर गरी अस्पताल बोलाएका थिए । सो समयसम्म कूल प्रसाद बर्देवा अर्धचेत अवस्थामा एक्लै बेडमा लडिरहेका थिए । उनलाई अर्धचेत अवस्थामा नै अस्पतालले डिस्चार्ज गरिदिएको थियो ।

त्यो बेलासम्म उनको उपचार खर्च १ लाख ३० हजार रुपैयाँ भइसकेको थियो । प्रसार्इले मलेसियामा नै काम गरिरहेका नेपालीहरुलाई तुरुन्तै खबर गरेर केहि पैसा संकलन गराइ उनलाई अस्पतालबाट निकालेका छन् ।

अझै अचेत अवस्थामा रहेका उनलाई उद्दार गर्नका लागि मलेसियामा रहेका नेपालीहरुले सहयोग संकलन गरिरहेका छन र सबैमा सहयोगको लागि अपिल गरिरहेको मलेसिया बस्ने नेपालीहरुले जनाएका छन् ।

उनि अहिले पनि प्रसाइकै घरमा रहेका छन् भने उनको स्वास्थ अवस्था नाजुक रहेको छ । मेलेसियामा उनको उपचार गराउनुभन्दा नेपालमा उपचार गराउन सहज हुने कारणले नेपाल फर्काउन सहयोगको अपिल गरिएको छ ।