मिस युनिभर्समा मनिता देवकोटा शीर्ष १० मा, फिलिपिनीलाई उपाधि
प्रकाशित २०७५ पुष २ सोमबार
701
Shares
काठमाडौँ । थाइल्याण्डको बैंककमा भएको मिस युनिभर्स २०१८ मा नेपालकी मनिता देवकोटा शीर्ष १० मा पर्न सफल भएकी छिन् । उनको यात्रा शीर्ष १० मै सकियो । देवकोटा यसअघि एसिया तथा अफ्रिका क्षेत्रका उत्कृष्ट पाँच प्रतिस्पर्धीमा पर्न सफल भएकी थिइन् ।
एसिया प्यासिफिक तथा अफ्रिका, अमेरिका र युरोपबाट उत्कृष्ट पाँच छनौट गरी १५ जना र पाँचजना वाइल्ड कार्डमार्फत् गरी शीर्ष २० छनौट गरिएको थियो । मनिता एसिया प्यासिफिक तथा अफ्रिकाका तर्फबाट तेस्रो नम्बरमा परेकी थिइन् ।
त्यसपछि हरेक प्रतिस्पर्धीलाई आफ्नो बारेमा १५ सेकेण्डको मन्तब्य दिने अबसर दिइएको थियो । यही मन्तब्यका आधारमा शीर्ष १० प्रतिस्पर्धीको छनौट गरिएको थियो ।
नेपालबाहेक, फिलिपिन्स, दक्षिण अफ्रिका, भियतनाम, भेनेजुएला, कोस्टारिका, कुराकाओ, क्यानडा, थाइल्याण्ड र पुयोर्टो रिको शीर्ष १० मा समावेश थिए ।
उपाधि भने फिलिपिन्सकी क्याट्रिओना ग्रेले जितेकी छिन् । २४ वर्षीया क्याट्रिओना मिस युनिभर्सको ताज जित्ने चौथो फिलिपिनो हुन् ।
तीन वर्षअघि पनि फिलिपिनो नै मिस युनिभर्स भएकी थिइन् । यसअघि सन् १९६९ र सन् १९७३ मा पनि फिलिपिनो मिस युनिभर्स भएकी थिइन् ।
फस्ट रनर अप दक्षिण अफ्रिका र सेकेन्ड रनर अप भेनेजुयला भयो ।
विश्वका सुन्दरीहरुको नजिक नजिक नेपाल पनि पुगेको छ । देवकोटाको यो अहिलेसम्मकै नेपाली सुन्दरीहरुको सबैभन्दा ठूलो फड्को हो ।
नेपालका सुन्दरी पनि ब्रेन विथ ब्यूटीमा अब्बल छन् भन्ने विश्वको ध्यान खिचिदै गएको छ । यसअघि विश्व सुन्दरी प्रतियोगितामा नेपालकी श्रृङ्खला खतिवडा शीर्ष १२ सम्म पुगेकी थिइन् ।
यसले नेपाल देशमात्र हैन त्यहाँका मानिस पनि सुन्दर छन् भन्ने देखाएको छ ।
