रोनाल्डोले पेनाल्टी सदुपयोग गर्दै लेभान्तेलाई दबाए

प्रकाशित २०७२ फागुन २० बिहिबार

एजेन्सी । स्पेनिश लिग ला लिगा फुटबलमा रियाल मड्रिड, एथ्लेटिक बिल्वाओ र भ्यालेन्सिया विजयी भएका छन् । वुधबार राति भएको खेलमा रियालले लेभान्तेविरुद्ध ३–१ को जित निकाल्यो । रियाललाई विजयी गराउन मुख्य फरवार्ड क्रिश्चियानो रोनाल्डोले ३४औं मिनेटमा पाएको पेनाल्टी सदुपयोग गर्दै टोलीलाई सुरुवाती अग्रता दिलाए । ३८औं मिनेटमा डिएगो मारिनोले एक गोल गर्दै अग्रता दोब्बर पारे । ३९औं मिनेटमा लेभान्तेका डायभर्सनले जवाफी गोल फर्काए । अन्तिम समयमा इस्कोले एक गोल गर्दा रियाल ३–१ ले विजयी भयो ।

जितसंगै रियालले दोस्रो स्थानमा रहेको एथ्लेटिको मड्रिडसंग अंक दूरी केही कम गरेको छ । यस्तै, एथ्लेटिक बिल्वाओले डेपोर्टिभो लाकोरुनालाई ४–१ ले पराजित गरेको छ । उता, भ्यालेन्सियाले मालागाविरुद्ध २–१ को जित दर्ता गर्दा सेभियाले इबारलाई १–० ले स्तब्ध पारेको छ । सेल्टाभिगो र भिल्लारियलले गोलरहित बराबरी खेल्दै अंक बाँडे । योसंगै २६ खेल खेलेको बार्सिलोना ६६ अंकसहित शीर्ष स्थानमा छ । दोस्रो स्थानको एथ्लेटिको मड्रिडको ६१ अंक छ भने, तेस्रो स्थानको रियालको ५७ अंक भएको छ ।