काठमाडौं । नेपाली कांग्रेसको आगामी नेतृत्वका लागि सभापतिको उम्मेद्वारी घोषणा गरेका महामन्त्री कृष्ण प्रसाद सिटौलाले यो समय कांग्रेसले आफैलाई ‘रिभ्यू’ गर्नुपर्ने बताएका छन् । सिटौलाले उद्घाटन समारोहलाई सम्बोधन गर्दै आफुहरुबीचमा कुनै भिन्नता नरहेको भन्दै सबै समान रहेकाले आफुले आफैलाई परिवर्तन गर्नुपर्ने बताएका हुन् । सिटौलाले भने, ‘हामी सबै समान छौं, कोही ठूला छैनौं, कांग्रेसले पश्चिमको दार्चुला, उत्तरको मुस्ताङ र दक्षिणको जनकपुर सबैलाई चिन्दछ ।’ हामी आफु बन्ने होइन, नेपाल बनाउने हो ।
सिटौलाले भनेका छन्, ‘नेपाल बनाउने हो भने हामी एक साथ जान सक्नु पर्दछ ।’ अवका दिनमा रगत बगाउने नभई समृद्धि दिने वातावरण सिर्जना गर्नुपर्दछ । सिटौलाले मुलुक आर्थिक विकासको पर्खाइमा रहेको भन्दै खाडीमा युवाले कमाएको पैंसाले आज देश चलिरहेको बताए । सिटौलाले भने, ‘त्यो अनेकौं पीडा झेलिरहेको युवा जमात स्वदेश फर्कन चाहान्छ, बाकसमा होइन–सकुशल ।’ देशका विभिन्न विषमतारु चिर्नुपर्ने जिम्मेवारी हामीले बहन गर्न सक्नु पर्ने छ ।
सिटौलाले फेरि एक पटक सवै राजनीतिक दलहरुलाई साथमा लिएर अघि बढ्नु पर्ने चुनौती रहेको सुनाए । संविधान निर्माणपछि अब पहिलो चरणको कार्यान्वयनमा स्थानीय निकायको निर्वाचन र प्रदेशको निर्वाचन गर्नु पर्ने छ । सिटौलाले भने, ‘त्यसपछि सरकार निर्माण हुँदै विभिन्न कानुन बनाउनु पर्ने चुनौती छ ।’ गिरिजाको कार्यदिशामा गणतन्त्र आयो, सुशीलको कार्यदिशाले संविधान निर्माण भयो ।
माओवादीको बन्दुकले दुखः दियो भन्दा प्रचण्ड भित्रैबाट मुस्कुराए
महामन्त्री कृष्ण सिटौलाले विगतमा केहिले राजाको बन्दुक र कहिले माओवादीको बन्दुकले दुःख दियो भन्दा एमाओवादी अध्यक्ष पुष्पकमल दाहाल भित्रै देखि मुस्कुराए । सोही कारण पनि दाहालले पछि आफु बोल्दा समेत सिटौलालाई सम्झिए ।
नेपालले आफै संविधान बनायो, जसले खुसी छु
सभापतिका उम्मेद्वार सिटौलाले नेपालले आफै संविधान बनाएकामा खुसी भएको बताए । उनले भने, ‘स्वविवेक नेपालले ८५ प्रतिशत भन्दा बढीको समर्थन लिएर ऐतिहासिक संविधान निर्माणको काम सम्पन्न गर्न सक्यो, जुन कार्य नै नेपाली राजनीतिक परिवर्तनको महत्वपूर्ण पाटो हो ।’
