मेसीको ह्याट्रिकले फराकिलो जित, बार्सिलोनाले २७ वर्ष अघिको रेकर्ड तोड्यो

प्रकाशित २०७२ फागुन २१ शुक्रबार

एजेन्सी । स्पेनिश लिग ला लिगा फुटबलमा बार्सिलोनाले मुख्य फरवार्ड लियोनल मेसीको ह्याट्रिकको मद्दतमा रायो भायकानोविरुद्ध शानदार जित निकालेको छ । भायकानोको घरेलु मैदानमा बार्साले ५–१ को शानदार जित निकालेको हो ।

बार्सिलोनाका लागि लियोनल मेस्सीले ह्याट्रिक गरे । मेसीले २३, ५३ र ७२औं मिनेटमा गोल गर्दै ह्याट्रिक पुरा गरे । यस्तै, इभाँ राकिटिच र अर्डा टुरानले एक–एक गोल गरे । लुइस सुआरेजले भने पेनाल्टी सदुपयोग गर्न सकेनन् । भायकानोका डिएगो लोरेन्टे र म्यानुअल लिटुर्रा रातो कार्ड पाएपछि ६७ औं मिनेटमै ९ खेलाडीमा सिमित भयो ।

यस्तै, रियाल बेटिसले इस्पानियोललाई ३–० ले हराउँदा ग्रनाडाले स्पोर्टिङ गिजोनलाई २–० ले स्तब्ध बनायो । २७औं चरणका खेल सकिँदा शीर्ष स्थानमा रहेको बार्सिलोनाको ६९ अंक भएको छ । दोस्रो स्थानको एथ्लेटिको मड्रिडको ६१ अंक छ भने तेस्रो स्थानको रियाल मड्रिडको ५७ अंक छ ।

२७ वर्ष अघिको डेकर्ड भङ्ग
जितसंगै बार्सिलोनाले ला लिगामा हाल सम्म सर्वाधिक अपराजित रहने टोलीको रेकर्ड तोडेको छ । यसअघि यो रेकर्ड रियाल मड्रिडको नाममा थियो । बार्सिलोनाले २७ वर्ष अघिको रेकर्ड तोडेको छ । बार्सिलोनाले लगातार ३५ खेलमा अपराजित रहेको कीर्तिमान बनाएको हो ।

यसअघि बार्साले कोपा डेल रेमा भ्यालेन्सियाविरुद्ध सात गोल गरेको बार्साले आफुनै नाममा रहेको अपराजित कीर्तिमान तोडेको थियो । बार्सिलोना प्रशिक्षक लुइस उन्ड्रिकले आफ्नो २९औं अपराजित यात्रा पुरा गरेका थिए । उनले त्यसअघि पेप ग्वार्डिवलाले बार्सालाई लगातार २८ खेलमा अपराजित राखेको कीर्तिमान तोडेका हुन् ।