एजेन्सी । इङ्गलिश प्रिमियर लिग फुटबलमा शीर्ष स्थानको लेस्टर सिटी विजयी हुँदा दोस्रो र तेस्रो स्थानमा रहेका टोटनह्याम हट्सपर र आर्सनल बराबरीमा रोकिएका छन् । बराबरीसंगै यी दुवैलाई धक्का लागेको छ । वार्टफोर्डको घरेलु मैदानमा लेस्टरले १–० को जित निकाल्यो । लेस्टरलाई जिताउन रियाद माहरेजले निर्णायक गोल गरे ।
यस्तै, टोटनह्याम र आर्सनलले २–२ को बराबरी खेल्दै अंक बाँडेका छन् । टोटनह्यामको घरेलु मैदानमा आर्सनलका लागि आरोन राम्सी र अलेक्सिस सान्चेज र टोटनह्यामका लागि टोबी एल्डर र ह्यारी केनले गोल गरे । आर्सनलका फ्रान्सिसले ५५औं मिनेटमा दोहोरो पहेलो कार्ड खाएपछि टोली १० जनामा सिमित बन्दै दबाबमा रहयो । यस्तै, म्यान्चेस्टर सिटीले भने फराकिलो जित निकालेको छ । सिटीले घरेलु मैदानमा एस्टन भिल्लाविरुद्ध ४–० को जित निकाल्यो ।
वेष्ट ह्याम युनाइटेडले एभर्टनलाई ३–२ ले हराउँदला एएफसी बर्नमाउथले न्यूकासल युनाइटेडलाई ३–१ ले स्तब्ध बनायो । चेल्सी र स्टोक सिटी तथा साउथ ह्याम्पटन र सण्डरल्याण्ड १–१ को बराबरीमा रोकिए । स्वान्सी सिटीले नर्विच सिटीलाई १–० ले हरायो ।योसंगै शीर्ष स्थानको लेस्टरको २९ खेलबाट ६० अंक भएको छ । दोस्रो स्थानमा रहेको टोटनह्यामको समान खेलबाट ५५ अंक छ । तेस्रो स्थानको आर्सनको ५२ अंक भएको छ । चौथो स्थानमा पुगेको म्यान्सिटीको ५० अंक भएको छ ।
