ला लिगामा बार्सिलोनाको एक छत्र राज, लियोनल मेसीको हिरो

प्रकाशित २०७२ फागुन २४ सोमबार

एजेन्सी । स्पेनिश लिग ला लिगा फुटबलमा बार्सिलोनाले शानदार जित निकालेको छ । इबारको घरेलु मैदानमा आइतबार राति भएको खेलमा बार्साले ४–० को शानदार जित निकालेको हो । बार्सालाई विजयी गराउन मुख्य फरवार्ड लियोनल मेसीले दुई र मुनिर अल हद्दादी र लुइस सुआरेजले एक–एक गोल गरे । जितसंगै बार्सिलोनाले उपाधि कब्जाको बाटो बलियो बनाएको छ ।

यस्तै, दोस्रो स्थानको एथ्लेटिको मड्रिडले भ्यालेन्सियालाई ३–१ ले हराउँदै उपाधि दावेदारी कायमै राखेको छ । एथ्लेटिक बिल्वाओले स्पोर्टिङ गिजोनलाई तथा रियाल बेटिसले ग्रनाडालाई २–० ले हरायो । उता, रियाल सोसिडाड र लेभान्ते भने १–१ को बराबरीमा रोकिए । योसंगै शीर्ष स्थानको बार्सिलोनाको २८ खेलबाट ७२ अंक भएको छ । समान खेलबाट ६४ अंक जोडेको एथ्लेटिको मड्रिड दोस्रो तथा ६० अंक बटुलेको रियाल मड्रिड तेस्रो स्थानमा छन् । ग्रनाडा, स्पोर्टिङ र लेभान्ते रेलिगेशन क्षेत्रमा छन् ।