एजेन्सी । इङ्गलिश प्रिमियर लिग फुटबलमा लिभरपुल र वेष्ट ब्रोमविच आल्वियन विजयी भएका छन् । आइतबार राति भएका खेलमा लिभरपुलले क्रिष्टल प्यालेसलाई २–१ ले हरायो । लिभरपुललाई विजयी गराउन रोबेर्टो फर्मिनो र क्रिष्टेन बेन्टेकले एक–एक गोल गरे । पहिलो हाफ गोल रहित बराबरी हुँदा दोस्रो हाफपछि घरेलु टोली क्रिष्टलले सुरुवाती अग्रता लिए पनि हार जोगाउन सकेन ।
४९औं मिनेटमा क्रिष्टलका जोसेफ लेड्लीले गोल गर्दै टोलीलाई अग्रता दिलाए । ६३औं मिनेटमा जेम्स मिल्नरले दोहोरो पहेलो कार्ड पाएपछि १० जनामा समेटिएको लिभरपुल आक्रामक बन्दै दुई गोल गरेको हो । उसका लागि फर्मिनोले ७२ र बेन्टेकले ९०औं मिनेटमा गोल गरे । जितसंगै लिभरपुल सातौं स्थानमा पुगेको छ । उसको २८ खेलबाट ४४ अंक भएको छ ।
म्यानयुको खराब लय जारी, भान गालमाथि ‘गाल’
यो सिजन इङ्गलिश प्रिमियर लिगमा खराब लयमा रहेको इङ्गलिश क्लब म्यान्चेस्टर युनाइटेड आइतबार राति वेष्ट ब्रोमको घरेलु मैदानमा १–० ले पराजित भयो । वेष्ट ब्रोमलाई विजयी गराउन जोस सलोमोन रोन्डनले निर्णायक गोल गरे । म्यानयुका स्ट्राइकर ह्वाँ माटा २७औं मिनेटमा दोहोरो पहेलो कार्ड खाँदै मैदानबाट वाहिरिएपछि १० जनामा सिमति बनेको फाइदा वेष्ट ब्रोमले उठायो । म्यानयुको हार यात्राले प्रबन्धक लुइस भान गालको जागिर संकटमा परेको छ । भान गालमाथि टोलीको खराब प्रदर्शनको ‘गाल’ आइपरेको छ । गाल निकै चिन्तित बनेका छन् । सुरुवातमा शीर्ष ४ भित्रै रहेको म्यानयु अहिले अंक तालिकाको छैटौं स्थानमा पुगेको छ ।
हाल सम्म खेलेका २९ खेल मध्ये १३ खेल मात्रै म्यानयुले जितेको छ । बाँकी १६ खेलमा ८ मा हार र ८ खेल बराबरी गरेको छ । म्यानयुको २९ खेलबाट ४७ अंक मात्र छ । शीर्ष स्थानको लेस्टर सिटीको ६० अंक छ भने दोस्रो स्थानको टोटनह्याम हट्सपरको ५५ तथा तेस्रो स्थानको आर्सनलको ५२ अंक छ ।
