काठमाडौं । विश्वमा पहिलोपटक स्मार्टफोनको व्यापार घटेको छ । काउन्टर रिसर्चको आँकडाअनुसार सन् २०१८ मा पहिलोपटक स्मार्टफोनको व्यापार घटेको हो ।
सन् २०१८ मासबै मुलुकमा गरी समग्रमा १ अर्ब ४९ करोड थान स्मार्टफोन बिक्री भएका थिए । सन् २०१७ मा यो आँकडा १ अर्ब ५५ करोड थियो । २०१८ को अन्तिम तीन महिनामा स्मार्टफोनको बिक्री ७ प्रतिशतले घटेको थियो । यसैगरी लगातार पाँचौं त्रैमासमा स्मार्टफोनको बिक्रीमा कमी आएको हो ।
सामसुङ पहिलो नम्बरमा
विश्वभर बिक्री भएका स्मार्टफोनमा १९ प्रतिशत बजार हिस्साको साथमा सामसुङ पहिलो स्थानमा छ । एप्पल र हुवावेईको बजार हिस्सा समान १४ प्रतिशत रहेको छ । साओमी ८ प्रतिशतको साथमा चौथो स्थानमा छ ।
अमेरिका, चीन र पश्चिमी युरोपजस्ता विकसित बजारमा पुनः प्रयोगको सीमा बढेसँगै स्माटैफोनको व्यापार घटेको हो । अर्थात् मानिसहरु धेरै लामो समयसम्म स्मार्टफोनको प्रयोग गरिरहेका छन् ।
सामसुङको नाफा ३१ प्रतिशत घट्यो
दक्षिण कोरियन कम्पनी सामसुङको नाफा अघिल्लो वर्षको अन्तिम तीन महिनामा ३१ प्रतिशतले घटेको छ । कम्पनीका उत्पादनको मागमा आएको कमीसँगै नाफा पनि घटेको हो ।
उक्त अवधिको नाफा ७ अर्ब ६० करोड डलरमा झरेको हो । यो अघिल्लो वर्षको सोही अवधिको तुलनामा ३१ प्रतिशत कम हो ।
