काठमाडौं । जापानको राजधानी सहर टोकियोमा सिंगल युवा युवतीलाई जोड खोजिदिने एक कार्यक्रम आयोजना गरिएको छ । सो कार्यक्रममा साना साना रोबर्टहरु पनि राखिएको थियो । रोबर्टहरुले यो कार्यक्रममा एकअर्कासँग कुरा गर्न लजाइरहेका युवायुवतीको कुरा आदानप्रदान गरिरहेको थियो ।
कार्यक्रममा २५ देखि ३९ वर्षका २८ युवायुवतीले भाग लिएका थिए । यी रोबर्टको माध्यमबाट ४ जोडी बनेका थिए । टोकियोमा रहेको आर्टिफिसियल इन्टेलिजेन्स, रोबर्टिक्स र अन्य प्रविधिमा काम गर्ने कन्टेन्ट इनोभेशन प्रोग्राम (सीआईपी) ले आयोजना गरेको थियो । सीआईपीका अधिकारी युनोसुके ताकाहाशीले आफ्नो विवाहको कुरा भन्न लजाउने मानिसका लागि सहयोग गर्ने बताए ।
समाचारमा बताइएअनुसार यो कार्यक्रममा आएका सहभागीलाई शुरुमा ४५ फरक फरक प्रश्न सोधिएको थियो । यसमा उनीहरुको इच्छा, शोख, नोकरीजस्ता जानकारी थिए । उक्त जानकारी अधिकारीहरुले रोबर्टमा अपलोड गरेका थिए । यसको आधारमा रोबर्टले उनीहरुको सानो परिचय पनि बनाएको थियो । यो विवरणको प्रयोग गरेर रोबर्ट्सले युवा–युवतीको कुरा एकअर्कामा पुर्याएका थिए ।
यसको सहारामा ४ जोडी बनेका थिए । एक सहभागीले रोबर्टको माध्यमबाट कुरा गर्नु निकै सजिलो भएको बताए । उनले आफ्ना सबै कुरा रोबर्टले सहजै बताइदिएको छ र आफूलाई केही भन्नु जरुरी नै नभएको बताए । जापानमा यस किसिमको कार्यक्रम भइरहने गरेको छ । जसमा सिंगलहरुले आफ्नो जोडी खोज्ने गरेका छन् । यस किसिमको कार्यक्रमलाई जापानी भाषामा ‘कोनकात्सु’ भनिन्छ । यद्यपि सिंगलहरुको कुरा एकअर्कालाई पुर्याउन रोबर्टको प्रयोग गरिएको भने यो पहिलोपटक हो ।
