बझाङ । घर पोत्नका लागी माटो खन्न गएका ३ जना महिलाको ढिस्कोमा पुरीएर मृत्यु भएको छ । शुक्रबार विहान ९ बजे माटो खन्ने क्रममा खिरातडी गाविस –२ की ४० वर्षीया कान्तामती कार्की, सोही गाविस–८ की २८ वर्षीया विष्णादेवी पन्त, र सोही ठाँउकी ३२ वर्षीया पशुपती कार्कीको माटोको ढिस्कोले पुरीएर मृत्यु भएको प्रहरी नायव उपरिक्षक लक्ष्मीराज अधिकारीले बताए ।
घर पोत्न प्रयोग हुने रातो माटो खन्नको लागि गाँउ नजिकै काँटेगडा भन्ने ठाँउमा गएका उनीहरुको माटो निकाल्न खोज्दा ढिस्को खसेर पुरीदा घटना स्थलमै मृत्यु भएको हो । ढिस्कोले पुरीएको जानकारी पाएपछि स्थानीय र प्रहरीले उद्धार गर्न खोजे पनि माटो पन्छाउन ढिलाई भएका कारण तिनै जनाको मृत्यु भएको बताइएको छ । वर्षेनी नयाँ वर्ष मा स्थानीय सँधै घरपोत्न रातो माटो निकाल्न जाने गर्दछन् । त्यसक्रममा हुने घटनाक्रममा महिलाले यसरी अकालमै मृत्युवरण गर्दछन् ।
