- सुन चाँदी दर
- विनिमय दर
- नेपाली पात्रो
- राशिफल
काठमाडौं । अमेरिकासंग भएको वार्ता विफल हुनुको कारण उत्तर कोरियाले खोलेको छ । उत्तर कोरियाका विदेशमन्त्री री योङ्गले अमेरिकासँगको वार्ता विफल हुनुको कारण खुलासा गरेका हुन् ।
उनका अनुसार उत्तर कोरियाले आफूमाथि लाग्दै आएको प्रतिबन्ध आंशिक रुपमा खुला गर्न माग गरेको थियो । अमेरिकाले सो प्रस्ताव अस्वीकार गरेपछि वार्ता विफल भएको हो ।
प्रतिबन्ध आंशिक रुपमा खुला गरेसँगै अमेरिकी पर्यवेक्षकको निगरानीमा उत्तर कोरियाको यङ्गबियन परमाणु अनुसन्धान केन्द्रलाई पूर्ण रुपमा बन्द गर्ने प्रस्ताव पनि उत्तर कोरियाले गरेको उनले बताए ।
बिहीबार राति पत्रकारहरुसँग कुरा गर्दै उनले प्रतिबन्धका कारण उत्तर कोरियाली नागरिकको जीवनमा चोट पुगेका कारण आंशिक रुपमा खुलाउन माग गरिएको बताएका थिए ।
अमेरिकी राष्ट्रपति ट्रम्पले भने उत्तर कोरियाले प्रतिबन्धहरु पूर्ण रुपमा हटाउन माग गरेको र त्यसलाई आफूले अस्वीकार गरेको बताएका थिए ।
योसंगै तेस्रो वार्तालाई समेत ट्रम्पले अस्वीकार गरेका छन् । उनले हनोई शिखर सम्मेलनजस्तो अवसर अब भविष्यमा फेरि प्राप्त हुन कठिन देखिएको बताए ।
अमेरिकी राष्ट्रपति डोनाल्ड ट्रम्प र उत्तर कोरियाली नेता किम जोङ उनबीच भियतनाममा बिहीबार भएको शिखर वार्ता विफल भएको हो । यसअघि गतवर्ष सिंगापुरमा सम्पन्न पहिलो शिखर वार्ता सकारात्मक बनेकोमा दोस्रो शिखर वार्तामा थप सहमति जुट्ने र दुई मुलुकबीच समझदारीपत्रमा हस्ताक्षरसमेत हुने अपेक्षा गरिएको थियो ।
वार्ता विफल भएपछि कोरियाली प्रायद्वीपमा दिगो शान्ति स्थापना हुनेमा आशंकाहरु उब्जिन थालेका छन् ।