काठमाडौं । पछिल्लो समय नयाँ पुस्ताको इन्टरनेट फाइभजीका लागि तीव्र गतिमा काम भइरहेको छ । यस वर्षसम्ममा यो प्रविधि आउने अनुमान छ । त्यसका लागि स्मार्टफोन निर्माताले पनि फाइभजी समार्टफोन ल्याउन शुरु गरेका छन् ।
अहिलेसम्म सार्वजनिक भएका फाइभजीलाई सपोर्ट गर्नसक्ने समार्टफोन यस्ता छन् –
१. हुवावेई मेट एक्स
चिनियाँ स्मार्टफोन निर्माता हुवावेईले मोबाइल वल्र्ड कंग्रेसको क्रममा आफ्नो पट्याउन मिल्ने र ५जी सपोर्ट गर्ने स्मार्टफोन अघि सारेको छ । हुवावेईको ५जी सपोर्ट गर्ने यो डिभाइस पट्याउँदा ६.६ इन्चको स्मार्टफोन बन्न सक्छ । यसलाई ८ इन्चको ट्याबलेट पनि बनाउन सकिन्छ । चिनियाँ कम्पनीले यो स्मार्टफोन २०१९ को मध्यबाट बजारमा उपलब्ध हुने बताएको छ ।
२. सामसुङ ग्यालेक्सी एस१० फाइभजी
दक्षिण कोरियन प्रविधि कम्पनी सामसुङले पनि फाइभजी सपोर्ट गर्ने आफ्नो नयाँ स्मार्टफोन ग्यालेक्सी एस१० उत्पादन ल्याएको छ । यसले निकै तीव्र गतिको फाइभजी नेटवर्क सपोर्ट गर्ने बताइएको छ । यो उत्पादन सन् २०१९ को दोस्रो त्रैमासमा बजारमा आउने अनुमान छ । साथै, सामसुङले फाइभजी सपोर्ट गर्ने पट्याउन मिल्ने स्मार्टफोन ग्यालेक्सी फोल्ड पनि ल्याएको छ ।
३. साओमी मि मिक्स ३
चिनियाँ स्मार्टफोन निर्माता साओमीले पनि मोबाइल विश्व कंग्रेसमा फाइभजी सपोर्ट गर्ने मि म्याक्स३ स्मार्टफोन सार्वजनिक गरेको छ । पछिल्लो तीन वर्षदेखि कम्पनीले फाइभजी चल्ने स्मार्टफोन निर्माणमा काम गरिरहेको थियो । आगामी मे महिनामा यो स्मार्र्टफोन बजारमा उपलब्ध हुनेछ ।
४. एलजी भी५० थिनक्यु
दक्षिण कोरियन कम्पनी एलजीले पनि फाइभजी सपोर्ट गर्ने भी५० थिंनक्यु स्मार्टफोन सार्वजनिक गरेको छ । ६.४ इन्चको डिस्प्ले भएको यो स्मार्टफोनमा ३ रेयर क्यामेरा रहेको छ । अहिलेसम्म यो स्मार्टफोन कहिले बजारमा आउने हो र मूल्य कति पर्ने भन्नेबारेमा भने कुनै जानकारी दिइएको छैन ।
५. जेटीई एक्सोन १० प्रो फाइभजी
फाइभ जी विस्तारको क्षेत्रमा काम गरिरहेको स्मार्टफोन निर्माता जेटीईले पनि नयाँ पुस्ताको इन्टरनेटलाई सपोर्ट गर्ने स्मार्टफोन सार्वजनिक गरेको छ । कम्पनीले एक्सोन १० प्रो फाइभजी स्मार्टफोन सार्वजनिक गरेको हो । यो स्मार्टफोन २०१९ को शुरुवाती ६ महिनाभित्र युरोप र चीनको बजारमा उपलब्ध हुने बताइएको छ ।
