एजेन्सी । स्पेनिश ला लिगा फुटबलमा रियाल मड्रिड, सेभिया र एथ्लेटिक बिल्वाओ विजयी भएका छन् । आइतबार राति लस पल्मसको मैदानमा रियालले २–१ को जित निकाल्यो । रियाललाई विजयी गराउन सर्जिओ रामोस र क्यासिमिरोले एक –एक गोल गरे । लस पल्मसका विलियन जोसले एक गोल फर्काए । यो खेलमा मुख्य फरवार्ड क्रिश्चियानो रोनाल्डो भने ओझेलमा परे ।
खेलको अन्तिम समयमा सर्जिओ रामोस दोहोरो पहेंलो कार्ड खाँदै मैदानबाट बाहिरिएपछी रियाल १० जनामा सिमित भयो । जितसंगै रियालले दोस्रो स्थानको एथ्लेटिको मड्रिडसंग अंक दूरी कम गरेको छ ।
यस्तै, सेभियाले भिल्लारियललाई ४–२ ले हराउँदा एथ्लेटिक बिल्वाओले रियाल बेटिसलाई ३–१ ले स्तब्ध तुल्यायो । लेभान्तेले भ्यालेन्सियालाई १–० ले पाखा लगायो । योसंगै २९ खेलबाट ७५ अंक जोडेको बार्सिलोना शीर्ष स्थानमा छ । दोस्रो स्थनाको एथ्लेटिको मड्रिडको ६७ अंक छ भने, तेस्रो स्थानको रियाल मड्रिडको ६३ अंक भएको छ ।
