काठमाडौं । इङ्गलिश प्रिमियर लिग फुटबलमा शीर्ष स्थानको लेस्टर सिटीको उत्कृष्ठ लय जारी छ । लेस्टरले शनिबार राति भएको खेलमा क्रिष्टल प्यालेसलाई १–० ले हराउँदै उपाधि दावेदारी बलियो बनाएको छ । क्रिष्टलको घेरेलु मैदानमा लेस्टरलाई विजयी गराउन रियाद माहरेजले निर्णायक गोल गरे । यस्तै, तेस्रो स्थानमा रहेको आर्सनलले एभर्टनविरुद्ध २–० को जित निकाल्यो ।
जितसंगै आर्सनलले दोस्रो स्थानको टोटनह्याम हट्सपरसंग अंक दुरी कम गरेको छ । अन्य खेलमा स्टोक सिटीले वाट्फोर्डलाई २–१ ले तथा नर्विच सिटीले वेष्ट ब्रोमविच आल्बियनलाई १–० हरायो । यस्तै, स्वान्सी सिटी घरेलुमैदानमा एस्टन भिल्लालाई १–० ले हराउन सफल भयो । संकटग्रस्त चेल्सी भने वेष्ट ह्याम युनाइटेडसंग २–२ को बराबरीमा रोकिएको छ । योसंगै ३१ खेलबाट शीर्ष स्थानको लेस्टर सिटीको ६६ अंक भएको छ । एक खेल कम खेलेको टोटनह्याम हट्सपरको ५८ अंक भएको छ । तेस्रो स्थानमा रहेको आर्सनलको ५५ अंक भएको छ ।
