एजेन्सी । इङ्गलिश प्रिमियर लिग फुटबलमा म्यान्चेस्टर युनाइटेड विजयी हुँदा लिभरपुल पराजित भएको छ । आइतबार राति भएको खेलमा म्यानयुले म्यान्चेस्टर सिटीलाई पराजित गरेको हो । सिटीको मैदान इत्तिहादमा भएको डर्बीमा युनाइटेडलाई विजयी गराउन मार्कस रास्फोर्डले निर्णायक गोल गरे । जितसंगै म्यानयुले पाँचौ स्थानमा रहेको वेष्ट ह्यामसंग अंक बराबरी गरेको छ ।
यस्तै, लिभरपुल साउह्याम्पटनसंग ३–२ ले पराजित भयो । घरेलु मैदानमा साउथह्याम्पटनका लागि सादियो मानेले दुई तथा ग्रेजियानो पेलीले एक गोल गरे । लिभरपुलका फिलिप कौटिन्हो र ड्यानिएल स्टुरीजले एक–एक गोल गरे । दोस्रो स्थानमा रहेको टोटनह्याम हट्सपरले एएफसी बर्नमाउथविरुद्ध ३–० को शानदार जित निकाल्दै शीर्ष स्थानको लेस्टर सिटीसंगको अंक दूरी कम गरेको छ ।
शीर्ष स्थानको लेस्टर सिटीसंग टोटनह्यामको पाँच अंकको फरक छ । लेस्टको ३१ खेलबाट ६६ अंक हुँदा समान खेलबाट टोटनह्यामको ६१ अंक भएको छ । तेस्रो स्थानको आर्सनलको भने ५५ अंक छ । आइतबार राति नै भएको अर्को खेलमा न्यूकासल युनाइटेड र सण्डरल्याण्डले १–१ को बराबरी खेलेका छन् ।
