एजेन्सी । स्पेनिश लिग ला लिगा फुटबलमा भल्लिारियलले बार्सिलोनालाई बराबरीमा रोकेको छ । लगातार उत्कृष्ठ लय जारी राखेको बार्सा आइतबार भिल्लारियलको मैदानमा भएको खेलमा अंक बाँड्न बाध्य भएको हो । पहिलो हाफ अघि २–० को अग्रता लिएको बार्साका लागि इभाँ राकिटिच र नेमारले गोल गरे । खेल अवधिभर दुई स्टार लियोनल मेसी र लुइस सुआरेज भने ओझेलमा परे । दोस्रो हाफ भिल्लारियलको पक्षमा रहयो ।
भिल्लारियलका सेड्रिक बाकाम्बु र रेजेमी म्याथ्युले एक–एक गोल गर्दै बार्साको २–० को अग्रतालाई २–२ मा ल्याए । पछी दुवै टोलीले गोल गर्न सकेनन् । यो बराबरीसंगै बार्साकाे अग्रता अझ मजबुद बनाउने प्रयत्न विफल भएको छ । यस्तै, एथ्लेटिक बिल्वाओलाई इस्पानियोलले २–१ ले हराउँदा भ्यालेन्सिया सेल्टाभिगोसंग २–० ले पराजित भएको छ । उता, तेस्रो स्थानको रियाल मड्रिले सेभियालाई ४–० ले हराउँदै दोस्रो स्थानको एथ्लेटिको मड्रिडसंग अंक दुरी कम गरेको छ ।
एथ्लेटिकोसंग रियालको १ अंकको मात्रै फरक छ । यो जितले रियाललाई उपाधि होड नजिक ल्याएको छ । ३०औं चरणका खेल संकिदा लिगको अंक तालिकामा ३० खेलबाट बार्सिलोनाको ७६ अंक भएको छ । दोस्रो स्थानको एथ्लेटिको मड्रिडको ६७ अंक छ भने, तेस्रो स्थानको रियाल मड्रिडको ६६ अंक भएको छ । योसंगै ला लिगा रोचक मोडमा पुगेको छ ।
