arrow

ओली सरकार जादैन, प्रचण्ड सरकार तत्काल आउदैन

logo
प्रकाशित २०७६ जेठ १९ आइतबार
kp-oli-prachanda.JPG

काठमाडौं ।  नेपाल कम्युनिष्ट पार्टी (नेकपा)का नेता  गोकुलप्रसाद बाँस्कोटाले प्रधानमन्त्री केपी शर्मा ओलीको सरकार तत्काल  परिवर्तन नहुने बताएका छन् । नेकपा अध्यक्ष ओली नेतृत्वको सरकार तत्काल  परिवर्तन नहुने र अर्का अध्यक्ष पुष्पकमल दाहाल ‘प्रचण्ड’को नेतृत्वमा सरकार तत्काल नब्ने संकेत गर्दै उनले हल्लाको पछि नलाग्न आग्रह गरे ।

 प्रेस सङ्गठन नेपाल सिन्धुलीले सिन्धुलीमाढीमा आइतबार आयोजना गरेको पत्रकार सम्मेलनमा सञ्चार तथा सूचना प्रविधिमन्त्री समेत रहेका बाँस्कोटाले भने, 'बेलाबेलामा चल्ने यस्तो हल्ला जसरी आउँछ उसरी नै जाने हुनाले हल्लाको पछाडि लाग्नु हुदैन।'

शुक्रबार नेकपा सचिवालय सदस्य बामदेव गौतमले नेपाल नेकपा अध्यक्ष प्रचण्डलाई प्रधानमन्त्री बनाउनुपर्ने बताएका थिए । एक अन्तर्वार्तामा प्रचण्डले सहमतिविपरित कुरा गर्न थालियो भने चिज अर्को ढंगले जाने बताएसँगै गौतमले प्रतिक्रिया दिएका थिए ।

गौतमले ‘नेकपाले पाँच वर्ष सरकार सञ्चालनको जिम्मा पाएको छ । अध्यक्षद्धय केपी शर्मा ओली र प्रचण्डले पालोपालो सरकार चलाउने सहमति भैसकेको छ । त्यही अनुसार सरकारको नेतृत्व परिवर्तन हुन्छ' भनेका थिए ।

प्रचण्डले प्रधानमन्त्री ओलीले साढे दुई वर्षपछि प्रधानमन्त्री छाड्नु हुन्न भन्ने कल्पना गर्न नसकिने बताउदै आएका छन् । त्यस लगत्तै ओली दाहालबचीको गोप्य भनिएको सहमति सार्वजनिक भएको थियो  ।

अर्को प्रसङ्गमा उनले अहिलेको बजेटले नेपालीको जीवनस्तरमा गुणात्मक सुधार गर्ने बताए । वाम चुनावी घोषणापत्रलाई आधार बनाएर अल्पकालीन र दीर्घकालीन विकासका अवधारणा अघि सारिएको बताउँदै उनले भने, “सामाजिक न्यायसहितको दु्रत आर्थिक विकासको नीति र समाजवादउन्मुख अर्थतन्त्रको आधारशिला बजेटले निर्माण गरेको छ, अब आत्मनिर्भर अर्थतन्त्रको माध्यमबाट राष्ट्रिय पूँजीको विकास गरी नेपालीलाई उन्नत समाजवादी दिशातर्फ अघि बढाउने सङ्कल्प हामीले लिएका छौँ ।”

शिक्षा, स्वास्थ्य, पूर्वाधारलगायत क्षेत्रमा नीति र कार्यक्रम अघि सारी अब जीवनस्तर गुणात्मक सुधार गर्न बजेटले सम्बोधन गरेको उनको भनाइ थियो । उनले  अहिलेको सरकारले पूर्वाधार बनाउने र पूर्वाधारले राष्ट्रलाई समृद्ध बनाउने विश्वास व्यक्त गरे ।

सन् २०३० सम्ममा नेपाललाई मध्यम आय भएको देश बनाइने र करीब १३ हजार डलर प्रतिव्यक्ति आय पुर्‍याइने उनको भनाइ थियो । हुलाकी राजमार्ग, सुनकोशी–मरिण ड्राइभर्सनलगायत धेरै क्षेत्रमा सरकारले बजेट विनियोजन गरेको जानकारी दिँदै उनले मुलुकका ७० जिल्लालाई आगामी आर्थिक वर्षभित्र साक्षर जिल्ला घोषणा गरिने बताए ।

“उत्पाकदत्व वृद्धि नगरी अर्थतन्त्रको जगलाई दरिलो बनाउन नसकिने भएकाले सरकारले उत्पादनमा जोड दिएको छ”, उनले भने, “यसले राष्ट्रिय अर्थतन्त्रमा सुधार ल्याउँछ ।” सरकारले पूर्वपश्चिम, उत्तरदक्षिण सबैतिर सडक सञ्चाल, रेल तथा जलमार्गको विकास गर्ने उनको भनाइ थियो ।
सामाजिक सुरक्षाभत्ता वृद्धिलगायत सरकारले ल्याएको बजेटले विपक्षी आत्तिएकाले अनावश्यक हल्लाको पछि नलाग्न उनले आग्रह गरे । कनिका छरेजस्तो बजेट भनेर प्रचार गरिए पनि त्यस्तो नभएको बताउँदै उनले बजेटका विषयमा अनावश्यक टिप्पणी गरेर अनावश्यक गीत नगाई देश विकासमा सबैलाई एक जुट हुन आग्रह गरे । “अहिले सरकारलाई उडाउनेलाई  पछि रेलमा गुडाइन्छ, तिनै व्यक्तिले टिकट काटेर रेल चढ्छन्, उडाउनेले उडाउँदै गर्छन्”, उनले भने ।

उनले सरकारले मिडिया काउन्सिल विधेयक पत्रकारको हितका लागि ल्याएको र त्यसले पत्रकारको पारिश्रमिक सुनिश्चित  गर्ने र अराजकता नियन्त्रण गर्ने बताए ।  नेपाल कम्युनिष्ट पार्टी (नेकपा) को नेतृत्व सम्पूर्ण नागरिकको हितमा लागेको बताउँदै नेकपाका नेता बाँस्कोटाले पार्टीका दुवै अध्यक्ष सरकार चलाउन सक्षम छन् भने ।



लोकप्रिय समाचार
लोकप्रिय समाचार
नयाँ