-
-
-
-
काठमाडौं । विम्बल्डन टेनिसको उपाधि रोमानियन खेलाडी सिमोना हालेपले जितेकी छिन् । शनिबार राति भएको फाइनलमा अमेरिकन रेकर्डहोल्डर सेरेना विलियम्सलाई पराजित गर्दै पूर्व विश्व नम्बर एक सिमोनाले उपाधि जितेकी हुन् ।
पहिलो विम्बल्डनको उपाधि जितेकी सिमोनाले सेरेनालाई ६–२ र ६–२ को सेटमा पराजित गरिन् । सेरेनाविरुद्ध जित निकाल्न हालेपले ५६ मिनेटको समय निकालिन् ।
सिमोनाले विम्बल्डन टेनिसको उपाधि जित्ने पहिलो रोमानियन खेलाडीको रेकर्डसमेत बनाएकी छिन् ।
सिमोनाले दोस्रो ग्राण्डस्लाम उपाधि जितेकी छिन् ।
२३ वटा ग्राण्डस्लाम जितेकी ३७ वर्षीया सेरेनाले यसपटक पनि अष्ट्रेलियन खेलाडी मार्गरेट कोर्टले बनाएको २४ ग्राण्डस्लामको रेकर्ड बराबरी गर्न सकिनन् ।
तर सेरेना सबैभन्दा बढी उमेरकी फाइनलिष्टको रेकर्ड भने बनाउन सफल भएकी छिन् ।
पुरुषतर्फको विम्बल्डनको उपाधिका लागि नोभाक जोकोभिक र रोजर फेडेरर आइतबार खेल्दैछन् ।
