भानुभक्त आचार्यको जन्मजयन्ती, भानु नगरपालिकाद्धारा सार्वजनिक बिदा
प्रकाशित २०७६ असार २९ आइतबार
555
Shares
काठमाडौं । आदिकवि भानुभक्त आचार्यको २०६ औं जन्मजयन्ती आइतबार विभिन्न कार्यक्रम गरी मनाइँदै छ ।
विभिन्न साहित्यिक कार्यक्रमसंगै प्रभातफेरी पनि निकालिएको छ । २०६ औं भानुजयन्तीको अवसरमा भानु प्रतिष्ठानद्वारा आइतवार प्रभातफेरी कार्यक्रम गरियो ।
स्कुलका छात्रछात्राले विभिन्न भेषभुषा र भावमा प्रभातफेरीमा सहभागिता जनाएका थिए ।
१८७१ सालमा तनहुँको चुँदीरम्घा गाउँमा जन्मिएका भानुभक्तलाई एक सामान्य घाँसीले ‘जन्मेपछि राम्रो काम गरेर नाम कमाउनुपर्छ’, भनी अर्ती उपदेश दिएकाले उनी रामायणलाई नेपालीमा रचना गर्न प्रेरित भएका थिए ।
नेपाली भाषामा ‘रामायण’ लेखेर ठूलो गुन लगाएका भानुभक्तले लेखेको रामायण अहिले पनि नेपालीको घरघरमा पाठ गरिन्छ ।
‘बधुशिक्षा’ उनको अर्को प्रसिद्ध कृति हो । यसैगरी ‘प्रश्नोत्तर’, ‘भक्तमाला’, ‘रामगीता’, फुटकर रचनालगायत कृति छन् ।
यसैबीच तनहुँको भानु नगरपालिकाले भानुजयन्तीका अवसरमा आइतबार सार्वजनिक बिदा दिएको छ ।
नेपाली भाषाका धरोहर भानुभक्त आचार्यको सम्मानस्वरुप नगरपालिकाले सार्वजनिक बिदा दिने निर्णय गरेको थियो ।
