शिक्षा पत्रकारिता सम्मान पत्रकार ओलीलाई प्रदान

प्रकाशित मिति : २०७६ भदौ २२ आइतबार

नेपालगन्ज । नेपालगन्ज उपमहानगरपालिकाले यसवर्षको शिक्षा पत्रकारिता सम्मान पत्रकार अर्जुन ओलीलाई प्रदान गरेको छ । ४० औं राष्ट्रिय शिक्षा दिवस एवम् ५३ औं अन्र्तराष्ट्रिय साक्षरता दिवसको अवसरमा नागरिक दैनिकका नेपालगन्ज संवाददाता ओलीलाई सम्मान गरेको हो । नेपालगन्ज उपमहानगरपालिकामा लामो समयदेखी शिक्षा तथा बालबालिकाको क्षेत्रमा पत्रकारिता मार्फत पुर्याएको योगदानको उच्च मुल्यांकन गर्दै ‘४० औं राष्ट्रिय शिक्षा दिवस एवम् ५३ औं अन्र्तराष्ट्रिय साक्षरता दिवस–२०७६’ बाट आइतबार सम्मान गरियो ।

दिवसको अवसरमा आयोजित औपचारिक कार्यक्रममा नेपालगन्ज उपमहानगरपालिकाका नगर प्रमुख डा. धवलशम्शेर राणा, उपप्रमुख उमा थापामगर लगायतले दोसल्ला ओढाएर कदरपत्रसहित सम्मान गरेका हुन् । सोही कार्यक्रममा नेपालगन्जमा क्रियाशिल अर्का पत्रकार कृष्ण अधिकारीलाई गतवर्षको सम्मान प्रदान गरिएको छ । हिमालय टेलिभिजनका पत्रकार अधिकारीलाई २०७५ सालको शिक्षा पत्रकारिता सम्मान यसवर्ष प्रदान गरिएको आयोजकले जनाएको छ ।

सो क्रममा उपमहानगरपालिकाले उत्कृष्ठ बिद्यालयको रुपमा सामुदायिकतर्फ जयजनता माध्यामिक बिद्यालय थपुवा र संस्थागततर्फ आर्दश माध्यामिक बिद्यालय नेपालगन्जलाई सम्मान गरेको छ । यस्तै शिक्षा क्षेत्रमा योगदान पुर्‍याएका सेवा निवृत्त शिक्षकहरु किरण आचार्य, कृष्णा पाठक, गिता शर्मा, आरती सिंह, लक्ष्मणप्रसाद गौतम, बृजेशबहादुर सिंह, होमनाथ गिरी, कृष्णकुमार शर्मालाई सम्मान गरिएको छ ।

यसैगरी शिक्षा क्षेत्रमा बढी बजेट विनियोजन गरी योगदान पुर्याएको भन्दै नेपालगन्ज उपमहानगरपालिका वडा नम्बर २० वडा कार्यालय तथा सामाजिक विकास मञ्च, बाँके युनेस्को क्लब, भेरी प्राविधिक शिक्षालय, प्याब्सन÷एन प्याब्सन लगायतलाई पनि सम्मान गरियो । सो क्रममा २०७५ सालको एसइई परिक्षा र कक्षा ८ को परिक्षामा उत्कृष्ठ नतिजा ल्याउन सफल भएका बिद्यार्थीलाई समेत पुरस्कृत गरिएको थियो ।

कार्यक्रममा जिल्ला समन्वय समिति बाँकेका संयोजक अजयकुमार श्रीवास्तवले ६ महिनाभित्रमका बाँकेलाई पुर्ण साक्षर जिल्ला घोषणा गर्ने प्रतिवद्धता जनाए । नगर प्रमुख राणाले शिक्षा क्षेत्रको सुधारका लागि सबै एक भएर लाग्नुपर्ने बताए ।

नगर उपप्रमुख थापाको सभापतित्वमा सम्पन्न कार्यक्रममा नगर शिक्षा प्रमुख गोर्खबहादुर थापा, नेपाल शिक्षक महासंघका केन्द्रिय सदस्य दोर्ण ओली, महासंघ नेपालगन्ज उपमहानगर अध्यक्ष मनोजराजा श्रीवास्तव लगायतले बोलेका थिए । सो क्रममा विभिन्न बिद्यालयका बिद्यार्थीले नृत्य प्रस्तुत गरेका थिए, भने कार्यक्रम सञ्चालन नेपालगन्ज उपमहानगरपालिका वडा नम्बर १२ का वडासदस्य तरुण बज्राचार्यले गरेका थिए ।

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ