वरिष्ठ पत्रकार हरिहर विरहीसहित विभिन्न व्यक्तिहरु सम्मानित

प्रकाशित २०७६ भदौ २८ शनिबार

काठमाडौँ । वरिष्ठ पत्रकार हरिहर विरही सम्मानित भएका छन् । राजधानीमा आयोजित एक भब्य समारोहमा विरही, वरिष्ठ संगीतकार देव राना र वरिष्ठ संगीतकर्मी राजु सिंहसहित विभिन्न व्यक्तिलाई सम्मानित गरिएको हो ।

विरहीलाई उनले ‘राष्ट्रियताको सुदृढिकरण, लोकतन्त्र, प्रेस र अभिव्यक्ति स्वतन्त्रता तथा नागरिक अधिकारको पक्षमा निरन्तर सक्रिय रहनुका साथै नेपाली पत्रकारिताको विकास र प्रबर्धनमा पुर्याएको विशिष्ट योगदानको उच्च मूल्यांकन गर्दै’ बिशेष सम्मान– २०७६ प्रदान गरिएको अभिनन्दनपत्रमा उल्लेख छ ।

औद्योगिक शान्ति नेपालद्वारा शुक्रबार राष्ट्रिय नाचघरमा आयोजित उक्त कार्यक्रममा सम्मानित देब राना नेपालका प्रथम ड्रम बादक हुन् । उनलाई ‘लाइफ टाइम एचिभमेन्ट सम्मान’ प्रदान गरिएको हो ।

चर्चित आधुनिक संगीतकार राजु सिंहलाई रजत सम्मान प्रदान गरिएको थियो ।

उनीहरुलाई प्रमुख अतिथि पूर्व प्रधानमन्त्री माधवकुमार नेपालले अभिनन्दनपत्र प्रदान गरेका थिए । सो अबसरमा २०७५ सालमा बजारमा आएका गीत र संगीतको मूल्यांकन गरि उत्कृष्ट गायक, गायिका, संगीतकार र गीतकारहरुलाई विभिन्न अवार्ड प्रदान गरिएको थियो ।