सकिँदै संघीय संसदको चौथो तथा बजेट अधिवेशन, प्रधानमन्त्री ओलीले संवोधन गर्दै
प्रकाशित २०७६ असोज २ बिहिबार
549
Shares
काठमाडौं । संघीय संसदको चौथो तथा बजेट अधिवेशन बिहीबार सकिँदैछ । संसदका दुवै अधिवेशनलाई प्रधानमन्त्री केपी शर्मा ओलीले संवोधन गर्ने कार्यक्रम रहेको छ ।
ओलीले दिउँसो २ः३० बजे संवोधन गर्ने कार्यक्रम रहेको संसद सचिवालयले जनाएको छ । हुनत प्रधानमन्त्रीले हरेक महिनाको पहिलो र तेश्रो साता संसद्मा सम्बोधन गर्ने व्यवस्था राखिएको छ ।
तर ओलीको स्वास्थ्य राम्रो नभएका कारणले यसले निरन्तरता पाउन सकेको छैन । यसअघि सभामुख कृष्णबहादुर महराले पनि यसबारेमा जानकारी गराएका थिए ।
यसअघि प्रधानमन्त्री ओलीले गत भदौ १ गते संसद्मा सम्बोधन गरेका थिए । साउन २७ गते सिंगापुरमा उपचार गरी फर्केपछि उनले संसदबाटै आफ्नाबारे जानकारी गराएका थिए ।
त्यो दिन भने उनको स्वास्थ्यले खासै साथ दिइरहेको थिएन । तर प्रतिपक्षीका साथै पूर्वराजावादीहरुलाई गाली गर्न भने उनले छाडेका थिएनन् ।
उनको बिहीबारको संवोधन पछिल्लो समसामयिक विषयमै केन्द्रीत भए पनि प्रश्नोत्तर भने हुने छैन ।
गत भदौ २० गते प्लाज्मा फेरेसिस उपचार गरी सिंगापुरबाट फर्केपछि प्रधानमन्त्री ओली सार्वजनिक कार्यक्रममा खासै बाहिर निस्केका छैनन् ।
उनी पहिलो पटक बुधबार दुई वटा कार्यक्रममा गएका थिए । चिकित्सकले पनि भीडभाडमा नजान भनिरहेका छन् ।
ओलीको स्वास्थ्यलाई ख्याल राखेर नेपाली काँग्रेसका सांसद गगन थापाले संसदमै उनलाई आराम दिनुपर्ने बताएका थिए ‘बा’ सम्वोधन गरेर ।
तर यसको सत्तारुढ नेकपाका सांसदहरुले चर्को विरोध गरेका थिए ।
