- सुन चाँदी दर
- विनिमय दर
- नेपाली पात्रो
- राशिफल
काठमाडौं । इंगलिश प्रिमियर लिग फुटबलमा लिभरपुलले १०० प्रतिशत खेल खेलेको छ । आइतबार राति लिभरपुलले अर्को उपाधि दावेदार चेल्सीलाई उसकै घरेलु मैदान स्टामफोर्ड ब्रिजमा भएको खेलमा पराजित गर्यो ।
लिभरपुल २–१ को गोल अन्तरले विजयी भयो ।
खेलको १४ औं मिनेटमा लिभरपुलले अलेक्जेण्डर अर्नोल्डको फ्रिकिक गोलबाट खेलमा अग्रता लिएको थियो । रोबर्टो फिर्मिन्होले ३० औं मिनेटमा हेड गोलमार्फत लिभरपुलको अग्रतालाई दोब्बर बनाएका थिए ।
खेलको ७१ औं मिनेटमा एन्टोनी कोन्टेले गोल गर्दै घरेलु टोलीलाई खेलमा फर्काउने कोशिश गरेका थिए । तर थप गोल हुन नसकेपछि लिभरपुलले खेल आफ्नो पक्षमा पार्यो ।
आइतबारका अन्य खेलको नतिजा
आइतबार म्यान्चेस्टर युनाइटेड पनि पराजित भयो । युनाइटेडलाई वेष्टह्याम युनाइटेडले २–० गोल अन्तरले पराजित गरेको हो ।
वेष्टह्यामको मैदानमा भएको खेलमा एन्डी यार्मोलेन्को र आरोन क्रेसवेलले १–१ गोल गरे ।
अर्को महत्वपूर्ण खेलमा आर्सनलले एस्टन भिल्लालाई ३–२ गोल अन्तरले हरायो । खेलको २० औं मिनेटमा जोन म्याकगिनले गोल गर्दै एस्टनलाई अग्रता दिलाए ।
४१ औं मिनेटमा एन्स्ले म्याटल्यान्ड नाइल्सले दोहोरो पहेंलोकार्डसहित रातो कार्ड पाएपछि १० जनामा सीमित भयो आर्सनल ।
५९ औं मिनेटमा निकोलस पेपेले पेनाल्टीबाट गोल गर्दै १–१ को बराबरी गरे ।
६० औं मिनेटमा वेस्लीले गोल गर्दै एस्टनलाई फेरि अग्रता दिलाए । ८१ औं मिनेटमा कालुम च्याम्बर्सले गोल गरेर आर्सनललाई २–२ को बराबरीमा ल्याए ।
८४ औं मिनेटमा पेर्रे इम्रिक आउबामेले गोल गर्दै आर्सनललाई एमाइरेट्स स्टेडियममा महत्वपूर्ण जित दिलाए ।
लिगको चौथो खेलमा क्रिस्टल प्यालेस र वुल्भरह्याम्पटनले १–१ गोलको बराबरी खेलेका छन् ।
अंक तालिका
छैटौं चरणको खेल सकिँदा लिभरपुल १०० प्रतिशत खेल्ने क्रममा १८ अंकसहित शीर्ष स्थानमा छ । दोस्रो स्थानको म्यान्चेस्टर सिटीको १३ अंक छ ।
११ अंकसहित लेस्टर सिटी तेस्रो, आर्सनल चौथो र वेष्टह्याम पाँचौं स्थानमा छ । ८ अंकबाट म्यान्चेस्टर युनाइटेड आठौं तथा चेल्सी एघारौं स्थानमा छ ।