वीरमा गैरकानुनी रुपमा कम्युनिष्ट कार्यकर्ताको हुल नै भर्ती गरिंदै

विज्ञापन बिना हुँदैछन् २५ स्टाफ नर्स भर्ना 

प्रकाशित मिति : २०७६ असोज ९ बिहिबार

काठमाडौं । चिकित्सा विज्ञान राष्ट्रिय प्रतिष्ठान (न्याम्स) वीर अस्पतालले गैरकानुनी रुपमा स्टार्फ नर्सहरु राख्दैछ । बिहीबार (असोज ९ गते) २५ स्टाफ नर्स राख्ने तयारीमा अस्पतालका निर्देशक डा. केदार सेन्चुरी लागेका छन् । 

निर्देशक सेन्चुरीले पदपूर्ति समितिलाई समेत छलेर विज्ञापन समेत ननिकाली २५ स्टाफ नर्स भर्तिको तयारी गरेका हुन् । 

बिहीबार स्टाफ नर्सहरुलाई खुसुखुसु नियुक्ति दिन लागिएको अस्पताल स्रोतले जनाएको छ । न्याम्सको सेवा आयोगबाट विज्ञापन खुलाएर मात्र कर्मचारी भर्ना गर्ने कानुनी ब्यवस्था रहेकामा त्यसलाई बाइपास गरेर आफूखुशी सेन्चुरीले भर्ना गर्न लागेको आरोप लगाइएको छ । 

करारमा कर्मचारी राख्दा पनि सेवा आयोगबाट विज्ञापन निकालेर मात्र राख्ने गरिएको छ । तर निर्देशक सेन्चुरीले सेवा आयोगसमेत छलेर कर्मचारी भर्ना गर्न लागेका छन् । 

स्टाफ नर्सको भर्नामा आर्थिक अनियमितता समेत भएको समाचार स्रोतले बताएको छ । एक नर्स बराबर ३ लाखदेखि ४ लाख रुपैयाँसम्म घुस लिएर नियुक्त गर्न लागिएको स्रोतको दावी छ । 

विना विज्ञापन सरकारी अस्पतालमा कर्मचारी भर्ना गरिएको बारेमा अख्तियार दुरुपयोग अनुसन्धान आयोगमा उजुरी नै हाल्ने तयारीमा न्याम्सका कर्मचारी रहेका छन् ।   

सत्तारुढ दल नेपाल कम्युनिष्ट पार्टी (नेकपा) का नेताहरुका आफ्ना कार्यकर्ता राख्नका लागि सेन्चुरीले ठूलो मद्धत गरिरहेको दावी अस्पतालका कर्मचारीहरुको आरोप छ । 

के भन्छन् त डा सेन्चुरी ? 
डा सेन्चुरीले भने आफूहरुको आवश्यकता भएकाले स्टाफ नर्स भर्ना गर्न लागिएको जनाएका छन् । उनले स्वास्थ्य मन्त्रालयले नर्स भर्नाका लागि ढिलाइ गरिरहेकाले अस्पतालले नै भर्ना गर्न लागेको बताए । 

विज्ञापन बिना नै भर्ना गर्न मिल्छ र ? भन्ने प्रश्नमा निर्देशक सेन्चुरीले पत्रिकामा विज्ञापन ननिकाले पनि अस्पतालमा सूचना जारी गरिएको बताएका छन् । 

उनले भने, ‘हामीलाई आइसीयु वार्ड चलाउनै गाह्रो भयो त्यसैले हामीले यो सामान्य सूचना जारी गरेर नै निकालेका हौं । थाहा त भैहाल्छ नि । विभिन्न संचार गरिरहेका हुन्छन् नि ।’

नेताहरुको जोडबलमा कार्यकर्ता भर्ना गर्न लाग्नु भएको भन्ने प्रतिक्रिया आइरहेका छन् नि भन्ने प्रश्नमा उनले भने, ‘हैन कार्यकर्ता भर्ना हैन प्रक्रिया पुर्याएरै गर्छौं । नेताहरुको सिफारिसमा हुन्छ भन्ने त्यस्तो छैन ।’

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ