वाह दशैं

प्रमोदहरि गुरागाईं प्रकाशित मिति : २०७६ असोज ११ शनिबार
प्रमोदहरि गुरागाईं

घरसँगै जोडिएको गोठ
मलको थुप्रोको साग
खेतको लहलह धान
खोलाको निरन्तर संगित
फलैंचामा पलेटी
टपरीमा मासु चिउरा
खल्पिको अचार
वाह दशैं ।

देऊरालीमा लठारे पिङ
नानीहरुको पहिलो पालो
युवा युवतीको दोहोरो मच्चाई
अगुवाहरुको पनि चचहुई
सितल बतास
मीठो पिरती
वाह दशैं ।

वेटरीको कालोले पोतिएको झ्याल ढोकाहरु
रातो माटो र कमेरोले लिपिएका भित्ताहरु
नयाँ नानामा सजिएका वस्तिहरु
तिक्तता बिर्षिएका मनहरु
भ्याई नभ्याई आतिथ्यहरु
लाला बाला सहित भेटिएका 
अपूर्ण प्रेमहरु
शुभकामनाका लहरहरु
चन्चल अनि मीठो शुवासहरु
वाह दशैं ।

नीलो आकाशको सितलता मुनी
पारीलो घामको ताप बोकेर
मखमली, सयपत्रीले सजिएका आँगनहरु
तरल संगै बहेका मनहरु
उमेर अनुसारका योजनाहरु
पुस्तौं पुस्ताका अनुभवहरु
आत्मीय आशिर्वादहरु 
वाह दशैं ।

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ