चाडपर्वको अवसरमा शिक्षिकालाई एड्भान्स तालिम

श्रीकृष्ण सिग्देल,  प्रकाशित मिति : २०७६ असोज १७ शुक्रबार

स्याङ्जा । शिक्षाको गुणस्तर अभिबृद्धि गर्न स्याङ्जाका शिक्षिकाहरुलाई एड्भान्स तालिम दिइएको छ । नेपाल शिक्षक संघ स्याङ्जाको महिला विभागले जिल्लामा कार्यरत शिक्षिकाहरुलाई नेपालीहरुको चाडपर्वको अवसर पारेर आयोजना गरिएको शुभकामना आदानप्रदान कार्यक्रममा सो तालिम प्रदान गरिएको हो । 

शैक्षिक क्षेत्रलाई सुधार गर्न सकेमात्र समाज सुधार हुने अपेक्षा राखेर शुभकामना आदान प्रदान सहित यो तालिम आयोजना गरेको महिला विभागले जनाएको छ । एक दिने कार्यक्रममा सहभागी भएका शिक्षिकाहरुले शैक्षिक व्यवस्थापन, कक्षा कोठा व्यवस्थापन, समय व्यवस्थापन सगै आधुनिक शैक्षिक प्रणाली र नेतृत्व विकासको बारेमा तालिम लिन पाउदा शैक्षिक उन्नयनमा टेवा पुग्ने विश्वास व्यक्त गरेका छन् । 

कार्यक्रममा वालिङ नगर प्रमुख दिलिपप्रताप खाँणले शैक्षिक पेशा समाजकै ऐना भएको बताउदै शिक्षक शिक्षिकाहरुलाई सम्मानित गर्नुपर्ने धारणा व्यक्त गरे । शिक्षक शिक्षिकाहरुले आत्मबल बढाउनु आवश्यक छ खाँणले भने,“शैक्षिक गुणस्तर बढाउन सकेमात्रै समाज रुपान्तरणमा टेवा पुग्छ ।” 

यसका लागि तिनतहकै सरकारले कार्ययोजना बनाएर अगाडि बढ्नु आवश्यक रहेको उनले बताए । समाजका लागि महत्वपूर्ण भुमिका खेल्ने शैक्षिक पेशाकर्मीले शैक्षिक गुणस्तरमा जिम्मेवारी लिएर अगाडी बढ्न खाँणले सहभागीहरुलाई आग्रह गरे । 

पाठ्यपुस्तक पनि स्थानीयतह भित्रै रहेका विद्यालयमा फरक—फरक हुनुले पनि शैक्षिक गुणस्तरमा कमजोर बनाएको अनुमान स्थानीय सरकारको छ खाँणले भने,“पाठ्यापुस्तकमा एकरुपता बनाएर शैक्षिक गतिविधि अगाडी बढाउनु आवश्यक छ ।” हरेक स्थानीयतहले यसको अभियान अब आगामी शैक्षिक सत्रबाट शुरु गनुपर्छ उनले भने । 

शैक्षिक गुणस्तर कमजोर हुदा राज्यका संयन्त्र पनि कमजोर हुने रहेका वालिङ नगर उपप्रमुख कल्पना तिवारीले भनिन्,“शिक्षा कमजोर हुदा मुलुकमा भ्रष्टाचार, हत्या, हिंसा, बलात्कार जस्ता घट्नाले प्रश्रय पाएको छ ।” 

यस्ता तालिमले हरेक शिक्षक शिक्षिकलाई शिक्षण सिकाई क्रियाकलापमा पुनर्ताजगी बनाउने छ उनले भनिन् । सरकारले पनि शैक्षिक क्षेत्रलाई सुधार गर्ने कार्ययोजना तयार गर्नु आजको आवश्यक रहेको तिवारीको भनाई छ । 

कार्यक्रममा शिक्षक संघका जिल्ला अध्यक्ष लक्ष्मी रेग्मी, देवी अर्याल, गायत्री आचार्य, शंकर ज्ञावाली, डण्डपानी पंगेनी, डीलमाया शर्मा, सुनिता काफ्ले, गीता अर्याल लगायतका शिक्षक शिक्षिकाहरुले यस्ता तालिमहरु बेलाबेलामा राखेर शैक्षिक पेशाकर्मीलाई ताजगी बनाउनु आवश्यक रहेको बताएका थिए । 

तालिम किशोरदत्त बराल र केशव अम्गाईले सहजीकरण गरेका थिए । महिला विभाग प्रमुख सीता गौडेल गैरेको अध्यक्षतामा भएको कार्यक्रमको स्वागत सीता सिग्देल अर्याल र संचालन इन्दिर केसीले गरेकी थिइन् ।  
 

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ