नेपालको टी–२० क्रिकेटको उपाधि भिडन्त कमजोर, आयरल्याण्डसंग १३ रनले पराजित

प्रकाशित मिति : २०७६ असोज २२ बुधबार

काठमाडौं । नेपालको ओमानमा भइरहेको पाँच देशीय टी–२० सिरिजमा उपाधि जित्ने सम्भावना कमजोर भएको छ । बुधबार भएको तेस्रो खेलमा टेष्ट मान्यता प्राप्त राष्ट्र आयरल्याण्डसंग १३ रनले पराजित भएपछि नेपालको उपाधि होड कमजोर बनेको हो । 

पहिलो खेलमा हङकङ र दोस्रो खेलमा नेदरल्याण्डलाई समान ४–४ विकेटले पराजित गर्दै उपाधि होडको यात्रालाई बलियो बनाएको नेपालले तेस्रो खेलमा बुधबार आयरल्याण्डसंग घुँडा टेकेपछि नेपालको सम्भावना कमजोर बन्यो । 

१४६ रनको लक्ष्य पछ्याएको नेपाल १९.५ ओभरमा अलआउट हुँदै १३२ रनमा आउट भयो । 

सुरुवाती ब्याट्सम्यानले सन्तुलिन ब्याटिङ प्रर्दशन गर्दै नेपाललाई राम्रो सुरुवात दिलाएका थिए ।

आरिफ शेखले २६ बलमा २६ रन बनाएको इनिङमा कप्तान पारस खड्काले २५ र ईशान पाण्डेले २२ रन बनाए । पहिलो विकेटका लागि ३५ रनको साझेदारी गर्ने क्रममा पारसले मात्र १४ बलको सामना गरेका थिए । त्यस्तै ईशानले ३० बल खेलेका थिए । 

दीपेन्द्र सिंह ऐरीले १९ र करण केसीले १६ रन बनाए । त्यसबाहेक अन्य खेलाडीले दोहोरो स्कोर जोड्न सकेनन् । 

आयरल्याण्डका मार्क अडियर र जर्ज डोकरेलले ३–३ विकेट लिए ।

यसअघि, टस जितेर पहिले ब्याटिङ गरेको आयरल्याण्डले ८ विकेटको नोक्सानीमा १४५ रन बनाएको थियो ।

ओपनर पाउल स्टर्लिङले सर्वाधिक ५९ रन बनाएका थिए । सन्दीप लामिछाने र अविनाश बोहराले २–२ विकेट लिए । करण केसी र ललित राजवंशीले १–१ विकेट लिए । सबैभन्दा खराव फर्ममा रहेका सोमपाल कामीले विकेट लिएनन् । 

आयरल्याण्ड सबै चार खेल खेलेर ६ अंकसहित तालिकाको शीर्ष स्थानमा उक्लिएको छ । नेपाल ३ खेलबाट ४ अंक सहित तालिकाको तेस्रो स्थानमा यथावत् छ ।

दोस्रो स्थानको आयोजक ओमानको २ खेलबाट ४ अंक नै छ । ओमानले तेस्रो खेलमा नेदरल्याण्डसंग खेलिरहेको छ । यो खेलमा ओमान कमजोर नेदरल्याण्डसंग फराकिलो हार बेहोरेमात्र नेपालको उपाधि सम्भावना रहन सक्छ । 

तर अन्तिम खेलमा बिहीबार नेपालले ओमानमाथि फराकिलो नै जित निकाल्नु पर्नेछ । तबमात्र आयरल्याण्डको रनरेट भन्दा बढी हुन सक्छ । जुन कमै सम्भावना छ । 

नेदरल्याण्ड र हङकङको अंक छैन । दुवै टिम उपाधि होडबाट बाहिरिइसकेका छन् । 

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ