लहान । संयुक्त मधेसी मोर्चाको आमहडतालका कारण करिब तीन महिनादेखि बन्द रहेका सिरहाका विद्यालय सञ्चालन भएका छन् । जिल्ला प्रशासन कार्यालय सिरहाको पहलमा भएको राजनीतिक दल, आन्दोलनरत पक्ष, स्थानीय प्रशासन, शिक्षक र अधिकारकर्मीलगायतको सर्वपक्षीय छलफलमा जिल्लाका विद्यालय सञ्चालनमा अवरोध नगर्ने सहमतिपश्चात् जिल्लाभरिका विद्यालय सञ्चालन भएका हुन् ।
आमहडतालका कारण विद्यालय बन्द हुँदा विद्यार्थीको पठनपाठन प्रभावित हुनुका साथै बालबालिकामा मनोवैज्ञानिक असर परेको भन्दै केही दिनअघि भएको सर्वपक्षीय छलफलमा पठनपाठन सञ्चालन गर्ने सहमति भएको थियो ।
लामो आमहडतालका कारण लाखौँ विद्यार्थीको भविष्य अन्योलमा परेकाले विद्यालय सञ्चालन गरेको नेपाल शिक्षक सङ्गठनका प्रमोदकुमार यादवले जानकारी दिए । जिल्लाभरिका विद्यालय सञ्चालन भए पनि विद्यालयमा विद्यार्थीको उपस्थिति कम रहेको उनले बताए ।
यता संयुक्त मधेसी मोर्चाका नेता कार्यकर्ताले विद्यार्थीको भविष्यलाई ख्याल गरी विद्यालय सञ्चालन गर्न दिन सहमत भएको बताएका छन् ।
