अयोध्यामा मन्दिर बन्ने भएपछि १०५ गाउँका क्षत्रियले ५०० वर्षपछि पगरी र जुत्ता लगाउने
प्रकाशित २०७६ मंसिर ३ मंगलबार
635
Shares
काठमाडौं । भारतको अयोध्यामा राम मन्दिरको महत्व कति रहेछ भन्ने कुराको प्रमाण सूर्यवंशी क्षत्रिय परिवारले दिएको छ ।
अयोध्यासंग जोडिएको बजार ब्लक र आसपासका १०५ गाउँका सूर्यवंशी क्षत्रिय परिवारले पाँच सय वर्षपछि फेरि एक पटक पगरी बाँधेर छालाको जुत्ता लगाउने भएका छन् ।
यसो गर्नुको पछाडि अयोध्यामा राम मन्दिर बन्नु रहेको छ । राम मन्दिर निर्माणको संकल्प पूरा भएपछि उनीहरुको गाउँमा खुशी छाएको हो ।
ती गाउँका घरघरमा गएर तथा सार्वजनिक सभामा गएर क्षत्रीयलाई पगरी बाँडिएको छ । सूर्यवंशी समाजका पूर्वजले मन्दिरमा भएको हमलापछि जबसम्म मन्दिर फेरि बन्दैन तबसम्म शिरमा पगरी नबाँध्ने र छालाको जुत्ता नलगाउने कशम खाएका थिए ।
सूर्यवंशी क्षत्रिय अयोध्याका साथै छिमेकी जिल्लाका १०५ गाउँमा बस्दै आएका छन् । यी सबै ठाकुर परिवार भगवान रामका वंशज भएको विश्वास गर्छन् ।
सर्वोच्च अदालतले राम मन्दिर निर्माणको आदेश दिएपछि अयोध्याका ती गाउँमा उत्साह फैलिएको छ ।
इलाहाबाद उच्च अदालतका पूर्व न्यायाधीश डीपी सिंहका अनुसार उनका पूर्वजले १६ औं शताब्दीमा मन्दिर बचाउन ठाकुर गजसिंहको नेतृत्वमा मुगलहरुसंग युद्ध लडेका थिए ।
त्यसमा उनीहरु हारे । त्यसपछि गजसिंहले पगरी र जुत्ता नलगाउने प्रतिज्ञा लिएका थिए ।
