काठमाडौं । क्रिस्टियानो रोनाल्डोले ह्याट्रिक गरेपछि इटालियन सिरी ए फुटबलमा युभेन्ट्सले फराकिलो जित निकालेको छ ।
सोमबार घरेलु मैदानमा भएको खेलमा युभेन्ट्सले काग्लियारीलाई ४–० गोल अन्तरले पराजित गरेको हो । युभेन्ट्सलाई जित दिलाउन रोनाल्डोले ह्याट्रिक गरे। यस्तै एक गोल गोन्जालो हिगुईनले गरे ।
खेलको ४९ औं मिनेटमा रोनाल्डोले पहिलो गोल गरे । ६७ औं मिनेटमा पेनाल्टीबाट व्यक्तिगत दोस्रो गोल गर्दै रोनाल्डोले युभेन्ट्सलाई २–० को अग्रता दिलाए ।
८१ औं मिनेटमा हिगुईनले गोल गर्दै घरेलु टोलीको अग्रता ३–० को बनाए ।
त्यसको एक मिनेटमै रोनाल्डोले व्यक्तिगत तेस्रो गोल गर्दै ह्याट्रिक पूरा गर्दै युभेन्ट्सलाई फराकिलो जित दिलाए ।
योसँगै रोनाल्डोले वर्षको पहिलो ह्याट्रिक गरे । रोनाल्डोको यो करियरको ५६ औं ह्याट्रिक समेत हो । उनी युरोपको शीर्ष तीन लिग प्रिमियर लिग, ला लिगा र इटालियन सिरी ए मा ह्याट्रिक गर्ने दोस्रो खेलाडी समेत बनेका छन् ।
अंक तालिका
१७ खेलबाट समान ४५ अंकमा रहेको इन्टर मिलानले युभेन्टसलाई गोल अन्तरमा पछाडि पार्दै शीर्ष स्थानमा पुगेको छ । ३९ अंकको लाजियो तेस्रो स्थानमा छ । रोमा ३५ अंकबाट चौथो स्थानमा छ । एटलान्टा ३४ अंकबाट पाँचौं स्थानमा छ ।
