- सुन चाँदी दर
- विनिमय दर
- नेपाली पात्रो
- राशिफल
काठमाडौं । इंगलिश एफए कप फुटबल अन्तर्गत आइतबार राति ३ खेल भएका छन् । जसमा १४ गोल भएको छ ।
म्यान्चेस्टर सिटी र म्यान्चेस्टर युनाइटेड जितसहित पाँचौं चरणमा पुग्दा प्रिमियर लिग लिडर लिभरपुलले रिप्ले खेल्नुपर्ने भएको छ ।
सिटीले फुल्हमलाई हरायो । १० खेलाडीमा सीमित फुल्हमलाई ४–० गोल अन्तरले पराजित गर्दै सिटी पाँचौं चरणमा पुगेको हो ।
घरेलु मैदानमा सिटीलाई जित दिलाउन ग्राबियल जिससले दुई गोल गरे । यस्तै इल्के गुण्डोगान र बेर्नार्डो सिल्भाले एक एक गोल गरे ।
खेलको छैटौं मिनेटमा टिम रिआमले रातो कार्ड पाएपछि फुल्हम सुरुवातमै १० खेलाडीमा समेटिएको थियो ।
यस गोलसँगै सिटीले यस सिजन सबै खाले प्रतियोगितामा १०० गोल पुरा गर्यो ।
त्यस्तै लिग वान क्लब ट्रान्मेरे रोभर्सलाई ६–० गोल अन्तरले पराजित गर्दै म्यान्चेस्टर युनाइटेड पाँचौं चरणमा पुगेको हो ।
युनाइटेडका लागि ह्यारी मागुएर, डिगो डालोट, जेसे लिंगार्ड, फिल जोन्स, एन्थोनी मार्सियल र मासुन ग्रीनवुडले एक एक गोल गरे ।
युनाइटेडले पहिलो हाफमा ५ तथा दोस्रो हाफमा १ गोल गर्न सफल भएको हो ।
प्रिमियर लिग लिडर लिभरपुलले भने रिप्ले खेल्नुपर्ने भएको हो । श्रेउबरीसंग २–२ गोलको बराबरीमा रोकिएपछि अब एन्फिल्डको घरेलु मैदानमा रिप्ले खेल्नुपर्ने भएको हो ।
शीर्ष खेलाडीहरु बिना मैदानमा उत्रेको लिभरपुलले २–० को अग्रता लिए पनि बराबरीमा रोकिनु पर्यो ।
१८ वर्षे कर्टिस जोन्सले गोल गर्दै लिभरपुललाई अग्रता दिलाए । डोनाल्ड लभले आत्मघाती गोल गर्दा लिभरपुल २–० ले अगाडि थियो ।
तर जासन कमिन्सले २ गोल गर्दै बराबरीमा ल्याए ।