काठमाडौं । चर्चित रियालिटी शो ‘दि भ्वाइस अफ नेपाल ’ की कोच गायिका आस्था राउत धरौटीमा रिहा भएकी छिन् । सोमबार थुनामै रात कटाएकी राउत चार हजार धरौटी बुझाएर रिहा भएकी हुन् । मंगलबार वयान लिएर सकिएपछि धरौटीमा रिहा भएको प्रहरी स्रोतले जनाएको छ ।
सोमबार राउतको वयान लिएर नसकिएपछि थुनामै रात कटाउनु परेको थियो । सोमबारै महानगरीय प्रहरी परिसर काठमाडौँमा आत्मसमर्पण गरेकी उनी अनुसन्धानका लागि चार दिन म्याद थपिएको थियो ।
राउतलाई हिरासतमा राखेसँगै सामाजिक सञ्जालमा प्रहरीको व्यापक विरोध भएको थियव । साथै संसदमा पनि प्रहरीले अधिकारको दुरुपयोग गरी अनुसन्धानका नाममा गायिका राउतलाई कारवाही अगाडि बढाएको आरोप लगाइएको छ ।
त्रिभुवन अन्तर्राष्ट्रिय विमानस्थलमा प्रहरीमाथि अभद्र व्यवहार गरेको अभियोग लागेकी आस्था नातेदारसहित टेकुमा रहेको महानगरीय प्रहरी परिसरमा उपस्थित भएकी थिइन् । विमानस्थलमा गत साता प्रहरीमाथि दुर्व्यवहार गरेको आरोपमा राउतमा हिरासत पुगेकी हुन् । आफूलाई दुर्व्यवहार गरेको आरोपमा प्रहरी जवान रमिशा श्रेष्ठले दिएको उजुरीको आधारमा उनलाई पक्राउ पूर्जी जारी गरिएको थियो ।
गत साता प्रहरी र राउतबीच सुरक्षाजाँचका क्रममा भएको भनाभनको विषयलाई लिएर उनले सामाजिक संजालमा बयानबाजी गरेकी थिइन् । घटना बुधबार अपराह्नको हो । राउत त्रिभुवन विमानस्थलको आन्तरिक उडान कक्षबाट भद्रपुर जाँदै गर्दा उक्त घटना भएको थियो ।
विमानस्थलमा महिला प्रहरीसँग भनाभन गरेको भिडियोसमेत सार्वजनिक भएपछि प्रहरीले आस्थामाथि दुर्व्यवहारको मुद्दा दायर गरेको हो । जिल्ला प्रशासन कार्यालयले अनुमति दिएपछि प्रहरीले गएको माघ ५ गते आस्थाका नाममा पक्राउ पुर्जी जारी गरेको थियो ।
