गच्छदारमाथि राजनीतिक पूर्वाग्रह, कांग्रेसले संसद चल्न दिने
प्रकाशित २०७६ माघ २८ मंगलबार
450
Shares
काठमाडौं । नेपाली कांग्रेसले प्रतिनिधिसभाको बैठक अवरोध नगर्ने भएको छ । पार्टी उपसभापति विजयकुमार गच्छदारविरुद्ध राजनीतिक पूर्वाग्रहका आधारमा अभियोग पत्र दायर गरिएको आरोप लगाउँदै पार्टीले सदन अवरुद्ध गर्दै आएको थियो ।
कांग्रेस संसदीय दल कार्यसमितिको मंगलबार बसेको बैठकले सो निर्णय गरेको सांसद दिलेन्द्रप्रसाद बडूले सञ्चारकर्मीलाई जानकारी दिए। बैठकले प्रचलित कानून र संवैधानिक निकायको निष्पक्षता र स्वतन्त्रता नै कमजोर हुने गरी राजनीतिक पूर्वाग्रह भई नेता गच्छदारविरुद्ध विशेष अदालतमा मुद्दा दायर भएको ठहर गरेको उनले जानकारी दिए ।
प्रतिनिधिसभाको मंगलबारको बैठकमा कांग्रेसले आफ्ना धारणा राखेर बैठक सञ्चालनमा सहयोग पुर्याउने सांसद बडूले बताए।
अख्तियार दुरुपयोग अनुसन्धान आयोगले बालुवाटारको जग्गा प्रकरणमा उपसभापति गच्छदारलगायत १७५ जनाविरुद्ध विशेष अदालतमा यही माघ २२ गते मुद्दा दायर गरेको थियो ।
