लिभरपुलको अपराजित यात्रा टुंगियो, यसरी भोग्यो लज्जास्पद हार
प्रकाशित २०७६ फागुन १८ आइतबार
436
Shares
काठमडौं । अन्ततः इंगलिश प्रिमियर लिग फुटबलमा लिभरपुलको अपराजित यात्रा टुंगिएको छ । लिभरपुलले सिजनको पहिलो हार ब्यहोरेको छ ।
शनिबार राति भएको खेलमा रेलिगेशन जोनबाट बच्न संघर्षरत वाटफोर्डले लिभरपुललाई ३–० को फराकिलो अन्तरले हराएको हो ।
ईस्माइला सर्रले दुई तथा कप्तान ट्रोय डेनीले एक गोल गरेपछि लिभरपुलको सिजनको अपराजित यात्रामा पूर्णविराम लागेको हो ।
पहिलो हाफ गोल रहित बराबरीमा सकिएको खेलमा घरेलु टोली वाटफोर्डले दोस्रो हाफमा तीन गोल गरेको थियो ।
सर्रले ५४ औं मिनेटमा गोल गर्दै वाटफोर्डलाई सुरुवाती अग्रता दिलाएका थिए । ६० औं मिनेटमा उनैले घरेलु टोलीको अग्रता दोब्बर बनाए ।
कप्तान डेनीले ७२ औ मिनेटमा गोल गर्दै वाटफोर्डको शानदार जित सुनिश्चित गरेका थिए ।
लिभरपुलले प्रियिमर लिगका पछिल्ला १८ खेलमा जित निकालेको थियो । वाटफोर्डबिरुद्ध जित निकाल्दै प्रिमियर लिग ईतिहासमा सर्वाधिक लामो जितको कीर्तिमान बनाउने अवसरबाट पनि चुकेको छ लिभरपुल ।
प्रिमियर लिगमा म्यान्चेस्टर युनाइटेडसंग बराबरी खेलेपछि लिभरपुल अपराजित थियो ।
अंक तालिका
प्रिमियर लिगमा शीर्ष स्थानको लिभरपुललाई २२ अंकको अग्रता प्राप्त छ । लिभरपुलको २८ खेलबाट ७९ अंक छ । दोस्रो स्थानको म्यान्चेस्टर सिटीको ५७ अंक छ । लेस्टर सिटीको ५० तथा चेल्सीको ४५ अंक कछ ।
नर्विच सिटी सबैभन्दा पुछारमा छ २१ अंकसहित । एस्टन भिल्लाको २५ तथा बर्नमाउथको २७ अंक छ त्यस्तै वाट्फोर्ड र वेष्टह्यामको पनि समान २७ अंक छ । वाट्फोर्डले जारी लिगको सबैभन्दा ठूलो सफलता हासिल गरेको हो ।
