- सुन चाँदी दर
- विनिमय दर
- नेपाली पात्रो
- राशिफल
काठमाडौं । अलकायदाका संस्थापक ओसामा बिन लादेनलाई मार्न सहयोग गर्ने पाकिस्तानी डाक्टरले जेलबाटै भोक हड्ताल सुरु गरेका छन् ।
पाकिस्तानको मध्य पंजाब प्रान्तको कारागारमा जेल सजाय भोगिरहेका डा शकील अफरिदीले जेलबाटै भोड हड्ताल सुरु गरेको उनका वकिल र परिवारले बताएको छ ।
अफरिदीले सीआईएलाई ट्र्याक गर्न र लादेनलाई मार्न सहयोग पुर्याएका थिए ।
सन् २०११ मा अफरिदीले नक्कली खोप कार्यक्रम मार्फत अमेरिकी एजेन्टहरूलाई अल् कायदा नेता ट्र्याक गर्न र मार्न मद्दत गरेदेखि जेलमा छन् ।
जेलमा रहेका दाइलाई भेटेपछि डा अफरिदीका भाइ जमीलले उनी र उनका परिवारविरुद्ध भएको अन्याय र अमानवीय व्यवहार विरुद्ध भोक हड्तालमा बसेको एएफपीलाई बताए ।
डा अफरिदीका वकिल कमर नदीमले पनि भोक हड्तालको पुष्टि गरे। अफरिदीलाई सन् २०१२ को मेमा ३३ वर्षको जेल सजाय सुनाइएको थियो ।
उनलाई आतंकवादीहरुसंग सम्बन्ध राखेको आरोपमा सजाय दिइएको हो । तर उनले त्यसलाई सधै अस्वीकार गर्दै आएका छन् ।
उनको सजाय पछि १० बर्ष घटाइएको थियो। केही अमेरिकी सांसदहरूले उक्त मुद्दालाई अल कायदा प्रमुखको खोजीमा उनको सहयोगको बदलाको रूपमा लिएका छन्।
२०११ मा बिन लादेनको हत्याले पाकिस्तान र विशेष गरी यसको शक्तिशाली सेनालाई ठूलो अप्ठ्यारो पारेको थियो।
धेरै वर्षदेखि अफरिदीले आफ्नो वकिलको पहुँच पाएका थिएनन् । यही कारणले उनको जेल सजायको बिरूद्ध अपील बारम्बार ढिलाइ भएको थियो।
उनका परिवारलाई भने सरकारका तर्फबाट पीडा दिने काम भइरहेको छ । सोही पीडाको विरुद्ध डा अफरिदी आमरण अनसन बसेका हुन् ।
अमेरिकी राष्ट्रपति डोनाल्ड ट्रम्पले पनि आफ्नो चुनावी अभियानको क्रममा पाकिस्तानलाई अफरिदीलाई मुक्त गर्ने आदेश दिने वचन दिएका थिए । तर पदभार ग्रहण गरेपछि उनले त्यो वचन भुले ।
ट्रम्प फेरि राष्ट्रपतिको उम्मेदवार बन्दैछन् । अमेरिकाले नै लादेनलाई मारेको थियो ।