काठमाडौँ । युरोपेली सङ्घ (इयु)ले भूकम्पपछिको पुनःस्थापना तथा पुनःनिर्माणका लागि नेपाललाई ११ अर्ब ६८ करोड ५० लाख अनुदान सहयोग दिने भएको छ । इयुले सरकारलाई ११ अर्ब नौ करोड ५० लाख ‘बजेटरी’ सहयोग तथा ५९ करोड प्राविधिक सहयोग गर्नेसम्बन्धी सम्झौतामा आइतबार हस्ताक्षर भएको छ ।
अर्थ मन्त्रालयमा आयोजित कार्यक्रममा नेपालका लागि इयुको प्रतिनिधिमण्डलका राजदूत रिन्चे टिरिङ र मन्त्रालयका सचिव लोकदर्शन रेग्मीले सो सहयोगसम्बन्धी सम्झौतामा हस्ताक्षर गरे । नेपालको पुनःनिर्माणका लागि अन्तर्राष्ट्रिय सहयोग जुटाउन गत वर्ष भएको अन्तर्राष्ट्रिय सम्मेलनमा इयुले सो रकम उपलब्ध गराउने प्रतिबद्धता जनाएको थियो ।
प्राविधिक सहायता अन्तर्गत उपलब्ध हुने रकम सार्वजनिक वित्त व्यवस्थापन, पारदर्शीता र जवाफदेहिता सुदृढ गर्न उपयोग गरिने मन्त्रालयको योजना छ । सार्वजनिक वित्त व्यवस्थापनसम्बन्धी काम आगामी सात वर्षसम्म सञ्चालन हुनेछ ।