arrow

आफ्नै पार्टी सभापति श्रेष्ठ बिरुद्ध उत्रिए कांग्रेस खोटाङका नेता कार्यकर्ता 

logo
प्रकाशित २०७६ चैत २४ सोमबार
khotang-congress.jpg

खोटाङ। कोरोना संक्रमणको आशंका गरिएका व्यक्तीलाई क्वारेन्टीनमा राख्ने विषयमा अवरोध पुर्‍याएका कांग्रेस खोटाङ जिल्ला सभापति नरेश कुमार श्रेष्ठको आफ्नै पार्टीका नेता कार्यकर्ताहरुले बिरोध गरेका छन्।

कोरोना संक्रमणको आशंका गरिएका ९ स्थानीयलाई हलेसी तुवाचुङ नगरपालिका–५ दुर्छिम स्वास्थ्यचौकीमा राख्ने विषयमा कांग्रेसका जिल्ला सभापति श्रेष्ठले अवरोध पुर्या‍एको भन्दै कांग्रेसकै नेता तथा कार्यकर्ताले बिरोध जनाएका हुन् । 

उदयपुरको कटारी अस्पतालको आइसोलेसनबाट भागेका उदयपुरको ताप्ली गाउँपालिका–४ ठानागाउँका नेपाली थरका ३९ वर्षीय पुरुष दुर्छिमको हैदेमा आफन्तको घरमा फेला परेपछि क्वारेन्टीनमा ल्याएर राख्ने क्रममा अवरोध पुर्या‍इएको भन्दै कांग्रेस क्षेत्र नम्बर २ का सभापति तिर्थराज भट्टराई, क्षेत्र नम्बर १ का उपसभापति लोकेन्द्र राजभण्डारी, तरुण दलका अध्यक्ष भिषण राई, नेविसंघका अध्यक्ष राजकुमार बस्नेत, ट्रेड यूनियन कांग्रेसका अध्यक्ष कृष्ण आचार्य, महिला संघकी अध्यक्ष रामकुमारी राई, नेपाल स्वास्थ्यकर्मी संघका अध्यक्ष प्रकाश घिमिरे, प्रेस यूनियनका अध्यक्ष उत्तम चौंलागाई र नेपाल लोकतान्त्रित खेलकुद संघका अध्यक्ष मिलन कसजूले सोमबार संयुक्त विज्ञप्ती निकाल्दै आफ्नै पार्टी सभापति विरुद्ध उभिएका हुन् । 

‘कोरोना भाइरस रोकथाम तथा नियन्त्रणका लागि जिम्मेवारी बहन गर्नेक्रममा सिंगो नगर कार्यपालिकाद्धारा गरिएको उद्धार कार्यप्रति आफ्नै पार्टीका सभापतिद्धारा गरिएको अश्लील, अभद्र र गैरजिम्मेवार अभिव्यक्ती सुनेर, देखेर र पढेर हामी दुःखी, अचम्मित र स्तव्ध भएका छौँ,’ विज्ञप्तीमा भनिएको छ, ‘कोभिड १९ को विरुद्ध मानव कल्याण र उद्धार गरेवापत मेयर इवन राई लगायतलाई धन्यवाद दिनुपर्नेमा उल्टै हप्काउनु, अश्लील गाली गर्नु न राजनैतिक न सामाजिक चरित्र हो । जिम्मेवार बन्न सकिन्न भने गैर–जिम्मेवार हुने स्वच्छन्दता कसैलाई छैन ।’ 

क्वारेन्टीनमा राख्ने विषयमा असहयोग गरेको भन्दै हाल कांग्रेसकै नेता तथा कार्यकर्ताले सामाजिक सञ्जालबाट विरोध जनाइरहेका बेला संयुक्त विज्ञाप्ती आएको हो । उनीहरुले सभापति श्रेष्ठबाट भएको असहयोग र फोनमा गरेको अश्लील सम्वादप्रति दुःख व्यक्त गरेका छन् । 

स्वास्थ्यचौकीमा तयारी अवस्थाको क्वारेन्टीनमा आईतबार ९ स्थानीयलाई राख्नेक्रममा सभापति श्रेष्ठले मानव वस्तीभन्दा टाढा क्वारेन्टीन बनाएर राख्न भन्दै असहयोग गरेको हलेसी तुवाचुङ नगरपालिकाका मेयर इवन राईले बताए । अवरोधकाबीचमा स्वास्थ्यचौकीकै क्वारेन्टीनमा संक्रमणको आशंका गरिएका व्यक्तीलाई राखिएको नगरपालिकाले जनाएको छ । 

भारतको सिलीगुढी हुँदै काँकडभिट्टाबाट घर फर्कनेक्रममा कटारी आइसोलेसनमा राखिएको अवस्थामा चैत १४ गते भागेका नेपाली आफन्तको घरमा बसिरहेको अवस्थामा चैत २३ गते फेला परेका थिए । 

वक्तव्य कांग्रेस नेता तथा कार्यकर्ताले संकटको समयमा आफ्नो जीवनको परवाह नगरी अहोरात्र खटिने मेयर, उपमेयर, वडाध्यक्ष, जनप्रतिनिधि, कर्मचारी, स्वास्थ्यकर्मी, प्रहरी लगायतको योगदानको प्रशंसा गर्दै कर्तव्यबोधकासाथ अघि बढ्ने प्रेरणाको कामना गरेका छन् ।



लोकप्रिय समाचार
लोकप्रिय समाचार
नयाँ