विश्वमान चित्रमा
खोज्दै जानुस् त
नेपाल भन्ने एउटा देश भेटिन्छ
अनि
अलि नियालेर हेर्दै जानुस् त
त्यो देशको राजधानी काठमाडौं भेटिन्छ
काठमाडौंलाई पनि अलि नियालेर हेर्दै जानुस् त
सेतो गगनचुम्बी महल भेटिन्छ
त्यो महल हो सिंहदरबार
त्यही महलका प्रत्येक कोठाभित्र
प्रधानमन्त्री र सरकारका मन्त्री बस्ने घुम्ने कुर्ची छ
जुन घुम्ने कुर्चीमा
राणा, पञ्चायत, वहुदलवादी र लोकतन्त्रवादी नामका छुट्टाछुट्टै अनुहारका
प्रधानमन्त्री र मन्त्रीहरु पालै पालो बसे
यतिबेला सिहदरबार भित्रको
ती प्रत्येक कोठाको कुर्चीमा
आफूलाई सर्वहारा वर्गको ठेकेदार ठान्ने
कम्युनिष्टधारी पार्टी
नेकपाका प्रधानमन्त्री र मन्त्री आसिन छन्
बाहिरबाट हेर्दा उनीहरुको
दृष्टिमा कुनै समस्या छैन
तर घुम्ने कुर्चीमाथि बसेपछि
प्रधानमन्त्री र मन्त्रीहरु केही देख्दैनन्
नपत्याए हेर्नुस् त
कोभिड —१९ को कहरका कारण
गर्भवती, सुत्केरी, अपाङगता भएका व्यक्ति र
अन्य नागरिकहरु भोकभोकै सयौं किलोमिटर हिँडिरहेका छन्
हिँड्दै गर्दा आकुल व्याकुल बनिरहेका छन्
त्यतिमात्र होइन
कति जनाको प्राण पखेरुसमेत
उडिसकेको छ
तर सिँहदरबार भित्रको
घुम्ने कुर्चीमाथि बस्ने
दृष्टिबिहिन बनिरहेका प्रधानमन्त्री र मन्त्री
बेखबर छन्
त्यतिमात्र होइन
सिंहदरबार भित्रका
ती दृष्टिबिहिन
कोरोनाको उपचार र नियन्त्रण गर्ने विषयमा समेत बेखबर बनिरहेको समाचार
सञ्चार माध्यमहरुमा आईरहेका छन् ।
सिंहदरबारको घुम्ने कुर्चीमाथि बस्ने
दृष्टिबिहिनहरु हो
अझै कति नदेखे झैं गर्छौ
देशका नागरिकहरु प्रश्न गर्दै छन्
बिन्ती छ सिंहदरबारभित्र बस्ने दृष्टिबिहिन हो
तिम्रो आँखाको शल्यक्रिया गरेर भए पनि
कोरोनाको कहरमा
नागरिकले भोग्नु परेको पीडा एक पटक आँखा खोलेर त हेर ।
