कपिलवस्तुमा पनि भेटियो २ जनामा कोरोना संक्रमण, नाघ्यो सय

नारायण ओली/ मणी प्रसाद गैह्रे

प्रकाशित २०७७ वैशाख २५ बिहिबार

रुपन्देही। कपिलवस्तुका दुई जनामा कोरोना संक्रमण भेटिएको छ। यो सँगै नेपालमा कोरोना संक्रमितको संख्या सय नाघेर एक सय १ पुगेको छ।

स्वास्थ्य मन्त्रालयले दिएको जानकारी अनुसार कपिलवस्तु मायादेवी गाउँपालिकाका २ जना पुरुषमा कोरोना संक्रमण देखिएको हो।

कपिलवस्तुको मायादेवी गाउँपालिकाको छत्रपाली तिर्थादेवी माध्यमिक विद्यालयको क्वारेन्टाइनमा रहेका युवाहरु ५ दिन अगाडी भारतको मुम्वईबाट नेपाल आएका थिए । उनिहरु सामान्य रहेको र बुटवल कोरोना अस्पतालमा लैजाने तयारी भएको बताइएको छ । कपिलवस्तुको मायादेवी गाउँपालिका २ साविक अभिराव गाविसका हो जो भारतसंग सिमाना जोडिएको छ ।

स्वास्थ्य तथा जनसंख्या मन्त्रालयका सहप्रवक्ता डा. समीरकुमार अधिकारीका अनुसार उनीहरु स्वास्थ्यकर्मीको सम्पर्कमा नै रहेका छन् र अवस्था सामान्य छ ।

काठमाडौंस्थित राष्ट्रिय जनस्वास्थ्य प्रयोगशालामा गरिएको स्वाब परिक्षणमा ती दुईमा कोरोना पोजेटीभ देखिएको हो।

मायादेवी गाउँपालिकाको क्वारेन्टाइनमै रहेका २२ र १६ बर्षिय दुई पुरुषमा कोरोना पुष्टी भएको मन्त्रालय स्रोतले जनाएको हो।

कपिलवस्तुमा पहिलो पटक कोरोना संक्रमित भेटिएका हुन् । उनिहरु ५ दिन अगाडी भारतको मुम्वईबाट आएका र आएपछि पकडीको क्वारेन्टइनमा राखिएको थियो ।

नेपालगञ्ज कोरोनाको हटस्पट बनेपछि प्रदेश नम्वर ५ सहित कर्णाली प्रदेशमा उच्च सतर्कता अपनाइएको थियो। यहि बीचमा प्रदेश ५को बाँकेको छिमेकी जिल्ला कपिलवस्तुका थप दुई जनामा कोरोना संक्रमण देखिए पछि यस क्षेत्रमा कोरोनाको त्रास बढेको छ।